ქართული ოცნების დეპუტატი, ლადო კახაძე აცხადებს, რომ გუშინ TV პირველის ეთერში გასული ჩანაწერები არ უნახავს, რადგან რამდენიმე ტელევიზიას საერთოდ არ უყურებს. ამის შესახებ მან On.ge-სთან საუბარში განაცხადა.

"არ მინახავს, არ მინახავს, ახლა ტელეფონში რაღაცებს ვკითხულობდი და არ მინახავს. საერთოდ, მე მაგ ტელევიზიას არ ვუყურებ, ბოდიშს ვიხდი. შეიძლება არ არის მისაღები, მაგრამ მე რამდენიმე ტელევიზიას არ ვუყურებ, იმიტომ, რომ არ მაწყობს დეზინფორმაციის ყურება, იმიტომ რომ მაგას სპეციალურად უნდა უყურო, გახედნილი უნდა იყო მაგაზე და მე არ მაქვს მაგის სურვილი არანაირი", — განაცხადა კახაძემ.

TV პირველმა გუშინ გაავრცელა ჩანაწერები, სადაც, სავარაუდოდ, ირაკლი ღარიბაშვილი, ბერა ივანიშვილი და ანზორ ჩუბინიძე იმ ადამიანების დასჯას გეგმავენ და განიხილავენ, ვინც ბერა ივანიშვილს აგინებს. ჩანაწერში საუბარია უკვე მომხდარ ფაქტებზეც, რომელთა მოყოლის პროცესში სავარაუდოდ, ირაკლი ღარიბაშვილი და ბერა ივანიშვილი იციანიან. სავარაუდოდ, ქართული ოცნების დამფუძნებლის შვილი კმაყოფილებას გამოხატავს იმის გამო, რომ მისი გინებისთვის ადამიანები ისჯებიან.

ამ დროისთვის უცნობია, ავთენტურია თუ არა ჩანაწერები. ქართული ოცნების რამდენიმე ლიდერმა ჯერ კიდევ გადაცემის ანონსის შემდეგ თქვა, რომ ეს არის "ფაბრიკაცია" და "შეკოწიწებული". თავდაპირველად ჩანაწერის გაკეთების თარიღად მათ 2011 წელი დაასახელეს, შემდეგ კი — 2010. ჩანაწერებს ამ დრომდე არ გამოხმაურებია შინაგან საქმეთა სამინისტრო, მიუხედავად იმისა, რომ ისმის სავარაუდო ძალადობისა და მომავალი ძალადობის გეგმების შესახებ. კომენტარები არ გაუკეთებიათ არც პრემიერმინისტრ ღარიბაშვილსა და ბერა ივანიშვილს.