საქართველოს ყოფილი სახალხო დამცველი და ამჟამად ქართული ოცნების ერთ-ერთი ლიდერი, სოზარ სუბარი აცხადებს, რომ "ცივილიზებულ ქვეყანაში" სასამართლოს შეუძლია TV პირველის ეთერში ფარული ჩანაწერების გაშვება აკრძალოს. მისი თქმით, "ჩვენც ამ გზით უნდა წავიდეთ". ასე ეხმაურება ის ტელეკომპანიის ანონსს, სადაც, სავარაუდოდ, ირაკლი ღარიბაშვილისა და ბერა ივანიშვილის ხმები ისმის.

"ცივილიზებულ ქვეყანაში, და მე მგონი, ჩვენც ამ გზით უნდა წავიდეთ, სასამართლოს პირდაპირ შეუძლია, გამოსცეს ამკრძალავი ნორმა, რომელიც აკრძალავს ამ სიუჟეტის ეთერში გასვლას. მაგრამ ვიდრე საქმე სასამართლომდე მივა, კარგი იქნება, სახალხო დამცველმა გამოთქვას თავისი პოზიცია და შეაფასოს, რა ჰქვია ასეთი უკანონო ჩანაწერების გამოქვეყნებას", — ამბობს ყოფილი ომბუდსმენი.

მისივე თქმით, "უკანონო ჩანაწერების მოპოვება, პირად ცხოვრებაში შეჭრა, მათი ფაბრიკაცია, დამონტაჟება, ფაბრიკაცია ისე, როგორც სააკაშვილს აწყობდა, ეს იყო თავად სააკაშვილისა და მისი ხელისუფლების სტილი და ხელწერა". სოზარ სუბარი აღნიშნავს, რომ ხელისუფლებაში ქართული ოცნების მოსვლის შემდეგ, ამისთვის არაერთი ადამიანი გასამართლდა და ათასობით ჩანაწერი განადგურდა, მაგრამ "როგორც ჩანს, მათ შავი არქივი წაღებული აქვთ და დღემდე იყენებენ ადამიანების წინააღმდეგ შანტაჟისთვის".

"ამის ნათელი გამოვლინებაა ახლა რაც ახლა ხდება — მორიგი ფაბრიკაციის გამოქვეყნებას აპირებენ და წინასწარ ატერორებენ საზოგადოებას. ეს არის ჩვეულებრივი დანაშაული, კრიმინალი, სააკაშვილის ხელწერაა. ქურდს რომ ქუდი ეწვის, გამოჩნდა იქიდან, რომ სააკაშვილი იყო ერთ-ერთი პირველი, ვინც გააზიარა. აქედან ჩანს, რომ სწორედ მისგან მოდის", — თქვა სუბარმა ტელეკომპანია იმედთან.

აღსანიშნავია, რომ ქართული ოცნების ხელისუფლებაში ყოფნის დროს გაურკვეველი წყაროებით არაერთი ფარული ვიდეო თუ აიდიო ჩანაწერი გავრცელდა, რომელთა გამოძიება ამ დრომდე არ დასრულებულა.

TV პირველმა გაავრცელა გადაცემის ანონსი, სადაც ისმის სავარაუდოდ, ირაკლი ღარიბაშვილისა და ბერა ივანიშვილის ხმა. ტელეკომპანიის ინფორმაციით, საუბარში მონაწილეობდა ანზორ ჩუბინიძეც. TV პირველი ამბობს, რომ ბერა ივანიშვილი ირაკლი ღარიბაშვილთან ერთად ადამიანების დასჯას უკვეთავს, რადგან მათი კომენტარები არ მოეწონა — "სკოლაში ჩაფსმული მივა იმენა დღეს", "ვერ წავიდოდა სკოლაში" ეს და სხვა ფრაზები ისმის ჩანაწერებში, რომელთა ავთენტურობა დადასტურებული არ არის.