მადონასადმი დიდი პატივისცემის მიუხედავად, სულაც ვერ დავეთანხმებით, რომ დრო ნელა გადის. სხვა თუ არაფერი, ის მაინც ვიცით დანამდვილებით, რომ დედამიწის ბრუნვის ტემპი ჩქარდება.

ამასობაში, საუკუნის 20-იანი წლებიც დაიწყო და Gen Z-ის უხუცეს წევრებს უკვე მეოთხედი საუკუნე შეუსრულდათ. 10-იანი წლების დასაწყისში ისინი ჯერ კიდევ თინეიჯერები იყვნენ, ამიტომ მათთვის განსაკუთრებით რთული იქნება იმის დაჯერება, რომ ამ სტატიაში ჩამოთვლილი სიმღერები მთელი ათწლეულის წინ გამოვიდა. მას შემდეგ ბევრმა წყალმა ჩაიარა, დედამიწამ მზეს 10-ჯერ შემოუარა და, სამწუხაროდ, ეს სიმღერები რეტრო კატეგორიას თუ არა, ნოსტალგიურ მუსიკას მაინც ეკუთვნის უკვე.

1. მიშელ ტელო — Ai Se Eu Te Pego

მიუხედავად იმისა, რომ სიმღერის ორიგინალური ვერსია ტელოს ნამდვილად არ ეკუთვნის, მის მიერ შესრულებულმა "ქავერმა" საყოველთაო ცნობადობა მოუტანა მომღერალსაც და პორტუგალიური სიმღერაც მსოფლიო ჰიტად აქცია. დღესდღეობით "ნოსა ნოსას" ოფიციალურ ვიდეოს იუთუბზე თითქმის მილიარდი ნახვა აქვს.

2. დევიდ გეტა და Sia — Titanium

Sia-ს არაერთი მსოფლიო ჰიტი აქვს დაწერილი სხვადასხვა ცნობილი მომღერლისთვის. Titanium-იც, რომელიც ავსტრალიელმა მომღერალმა 40 წუთში დაწერა, სხვა მომღერლისთვის იყო განკუთვნილი. თავდაპირველად სიმღერის შემსრულებლად ალიშა კისი განიხილებოდა, შემდგომ იგი კეტი პერისაც შესთავაზეს, თუმცა, ამ უკანასკნელმა უარი თქვა და დევიდ გეტას ურჩია, Sia-ს დაუმუშავებელი ვერსიის ჩანაწერი გამოეყენებინა.

გეტაც ასე მოიქცა და მომღერლის უკითხავად გამოიყენა მისი აუდიოჩანაწერი სიმღერის საბოლოო ვერსიაშიც, რომელიც არაერთი ჩარტის ლიდერი გახდა. Sia-ს თქმით, გეტას ამ ქმედებამ გაანაწყენა, თუმცა, აღიარა, რომ Titanium მისი, როგორც სიმღერების ავტორის კარიერაში გარდამტეხ მომენტად იქცა.

3. რიანა და კალვინ ჰერისი — We Found Love

რიანა კი ისედაც არ უჩიოდა მსოფლიო ჰიტების ნაკლებობას, ბოლოს და ბოლოს, Umbrella თავის დროზე მის ყველაზე პოპულარულ სიმღერად იქცა, თუმცა, ჰერისის კარიერაში ნამდვილად დიდი გავლენა მოახდინა ბარბადოსელ მომღერალთან ერთად We Found Love-ზე მუშაობამ.

4. კეტი პერი — Last Friday Night

სხვათა შორის, ერთ-ერთ მიზეზი, რატომაც პერიმ Sia-ს დაწერილ სიმღერაზე თქვა უარი, რამდენიმე თვით ადრე გამოშვებული ჰიტი, Firework, იყო. ჟანრობრივად განსხვავებული სიმღერის ძიებაში ამერიკელმა მომღერალმა სიმღერა Last Friday Night დაწერა, რომელიც მალევე იქცა პარასკევი დღის ჰიმნად.

5. ჯენიფერ ლოპესი და Pitbull — On The Floor

ჯეილოს და Pitbull-ის კოლაბორაცია თავისთავად წარმატებულ პროექტს გულისხმობდა, თუმცა, სიმღერა, რომელიც, მოგვიანებით, ზაფხულის საცეკვაო ჰიტად იქცა, ლამბადას მელოდიასაც შეიცავს, რამაც მას უფრო ლათინური ელფერი შესძინა და არაერთი ჩარტის უპირობო ლიდერად აქცია.

6. Jessie J — Price Tag

ინგლისელი მუსიკოსის ერთ-ერთი ყველაზე წარმატებული სიმღერა, რეალურად, მუსიკის სიამოვნებისთვის წერაზეა. "It's not about the money" — სიმღერის ტექსტი ფულის კეთების ნაცვლად დროის ტარებისკენ მოწოდებაა, რადგან "ფულით ბედნიერებას ვერ იყიდი". ირონიულია, თუმცა, სიმღერა Jessie J-ის ერთ-ერთ ყველაზე გაყიდვად სინგლად იქცა — მსოფლიოში მისი 3 მილიონი ასლი გაიყიდა.

7. Coldplay — Paradise

ბრიტანული ჯგუფის ეს სიმღერა მათი სხვა ბევრი ჰიტის მსგავსად ოცნებებსა და ესკაპიზმზეა. ამ იდეამ ჯგუფის მსმენელები მთელ მსოფლიოში გააერთიანა, მათ შორის, საქართველოშიც, სადაც Paradise წლების განმავლობაში რჩებოდა მუსიკალური კონკურსების და ახალგაზრდული ბანაკების საყვარელ საუნდტრეკად.

8. ბრუნო მარსი — The Lazy Song

ბრუნო მარსი ბითლზის ჰიტებზე უკეთესი სიმღერის შექმნას ცდილობდა, რომელიც, რამდენიმესაათიანი მცდელობის შემდეგ, რასაკვირველია, არ გამოუვიდა. შემდგომ, "მოეშვა" და სიმღერის ტექსტიც თავისთავად დაიბადა — Today, I don't feel like doing anything — "დღეს არაფრის კეთების ხასიათზე ვარ".

არაფრის კეთების ხასიათზე ყოფნამ მარსს 2011 წლის ერთ-ერთი ყველაზე პოპულარული სიმღერა დააწერინა, რომელსაც, ყოველ შემთხვევაში, ბითლზის სიმღერების ვიდეოებზე მეტი ნახვა მაინც აქვს იუთუბზე — კლიპი ორ მილიონზე მეტჯერ ნახეს.

9. Fun — We Are Young

სიმღერა, რომელიც ასევე მსოფლიოს სხვადასხვა ქვეყანაში დიდი პოპულარობით სარგებლობდა, ბილბორდის Hot 100-ის სიის სათავეში იყო ზედიზედ 6 კვირის განმავლობაში.

10. ადელი — Someone Like You

მხოლოდ ფორტეპიანოს აკომპანიმენტით ჩაწერილი სიმღერა 10 წლის შემდეგაც კი რჩება დაშორების შემდეგ მოსასმენი სიმღერების სიაში პირველ ადგილზე. ჰიტის შთაგონების წყარო სწორედ მომღერლის წარუმატებელი ურთიერთობა გამოდგა.

საბოლოო ჯამში, სიმღერა არა მხოლოდ 2011 წლის, არამედ 21-ე საუკუნის ერთ-ერთი ყველაზე წარმატებული პროექტი გამოდგა. ბრიტანულ ჩარტებში პირველ ადგილზე, ამერიკულ ჩარტებში — მეორე ადგილზე და ბილბორდის Hot 100-ის სათავეში მოქცეული Someone Like You 2015 წელს საუკუნის ყველაზე გაყიდვად სინგლებში მეოთხე ადგილზე აღმოჩნდა.

ბონუსი: ლედი გაგა — Born This Way

Born This Way სიაში ბონუსად შემთხვევით არ აღმოჩენილა. სიმღერა, რომელიც ლედი გაგას მეორე სტუდიურ ალბომში შედის, ნამდვილად იმსახურებს განსაკუთრებულ აღნიშვნას. საქმე მხოლოდ კომერციულ წარმატებას და ჩარტების ლიდერობას არ ეხება; Born This Way საკუთარი თავის მიღებასა და უპირობო სიყვარულს ეხება.

ინტერნეტსივრცეში ადამიანები წერდნენ და კვლავ წერენ, რომ სიმღერამ მათ თვითრწმენა დაუბრუნა. მნიშვნელობის გამო, სინგლი ლგბტქ თემის ჰიმნადაც შეგვიძლია მივიჩნიოთ — იგი გეი-პრაიდებზე ერთ-ერთი ყველაზე ხშირად გაჟღერებული სიმღერაა.