როგორც ცნობილია, 2020 წელი განსაკუთრებით ნაყოფიერი იყო ქალი რეჟისორებისთვის და მათ შორის ერთ-ერთი ქართველი ხელოვანიც აღმოჩნდა: დეა კულუმბეგაშვილი, რომლის სადებიუტო სრულმეტრაჟიანმა ფილმაც დასაწყისი მრავალი მაყურებლისა თუ კრიტიკოსისგან საოცრად დადებითი შეფასებები დაიმსახურა.

აქამდე მხოლოდ ფილმიდან ცალკეული კადრები ვრცელდებოდა, რამდენიმე დღის წინ კი პირველი ტრეილერიც გამოქვეყნდა, რომელიც საინტერესო და დაძაბულ ისტორიასთან ერთად, შთამბეჭდავ სანახაობას გვპირდება:

გასული წლის ოქტომბერში საქართველოს ეროვნულმა კინოცენტრმა სპეციალური კომისიის მიერ ჩატარებული კენჭისყრით სწორედ დასაწყისი აირჩია ოსკარების 2021 წლის დაჯილდოების კანდიდატად, რომელიც საუკეთესო საერთაშორისო სრულმეტრაჟიანი ფილმის ნომინაციაში (შარშანდლამდე ამ ნომინაციას საუკეთესო უცხოენოვანი ფილმი ეწოდებოდა) მოსახვედრად საქართველოს სახელით იბრძოლებს.

აქედანვე თამამად შეგვიძლია ვივარაუდოთ, რომ წელს საქართველოს ამ წარმატების მიღწევის ისეთი დიდი შანსი აქვს, როგორც მანამდე არასდროს: "დეა კულუმბეგაშვილის სადებიუტო სრულმეტრაჟიანი ფილმი 2020 წლის კინოფესტივალებზე ერთ-ერთი ყველაზე გახმაურებული სურათი იყო, რომელზეც ყველაზე ხშირად საუბრობდნენ: სან-სებასტიანის საერთაშორისო კინოფესტივალზე, რომლის ჟიურისაც რეჟისორი ლუკა გუადანინო ხელმძღვანელობდა, ფილმმა ერთდროულად ოთხ მთავარ ნომინაციაში მოიპოვა ჯილდო – საუკეთესო სცენარი, საუკეთესო რეჟისორი, საუკეთესო მსახიობი და საუკეთესო ფილმი", — წერს ერთ-ერთი ყველაზე გავლენიანი ამერიკული ონლაინგამოცემა IndieWire.

აღსანიშნავია ისიც, რომ დასაწყისის პრემიერა კანზე უნდა შემდგარიყო, თუმცა გასულ წელს კინოფესტივალი ჩაიშალა. ფილმის ჩვენება მხოლოდ რამდენიმე ფესტივალზე გაიმართა, ფართო აუდიტორიას კი დახურული კინოთეატრების გამო მისი ხილვის შესაძლებლობა ჯერ არ ჰქონია, თუმცა 29 იანვარს ის პლატფორმა Mubi-ზე გამოჩნდება და არაერთი ქვეყნიდან იქნება მისი ხილვა შესაძლებელი.