მოქალაქეების ერთ-ერთი ლიდერის ლევან იოსელიანის თქმით, მას რაღაც კომსულტაცია აქვს გირჩის ერთ ნაწილთან. ამის შესახებ მან პალიტრანიუსის ეთერში განაცხადა.

"მე, პირადად გეტყვით, რომ რაღაც კონსულტაცია მაქვს გირჩის ერთ ნაწილთან და ვიცი მათი პოზიცია. ყველანი ერთ პროცესში ვართ და ერთმანეთისგან გათიშული ვერ ვიქნებით. მე ვიცი მათი ხედვა, მათ ჩვენი ხედვა იციან. ჩვენ ვიცით, რომ რაღაცებში განსხვავებული პოზიცია გვაქვს. მაგალითად, თვითმმართველობის რეფორმის დონეზე, ისინი ნულოვანი ბარიერის მომხრე არიან, ჩვენ ვთვლით, რომ თბილისში ათი მაჟორიტარი ოლქი უნდა იყოს. მაგრამ ეს არ გვიშლის ხელს ერთობლივი საკითხისადმი, რაცაა: შეთანხმებით ამ პროცესის განმუხტვა", — ამბობს იოსელიანი.

4 დეკემბერს ცნობილი გახდა, რომ პარტია გირჩი გაიყო. ზურაბ ჯაფარიძის თქმით, იაგო ხვიჩიასთან, ვახტანგ მეგრელიშვილთან და ალექსანდრე რაქვიაშვილთან ერთად გირჩის კეთებას აღარ აპირებს. ამის შესახებ ჯაფარიძემ Facebook ჯგუფ გირჩის ბაბლში დაპოსტა.

მე-10 მოწვევის პარლამენტმა ოფიციალურად მუშაობა 11 დეკემბერს დაიწყო. პარალელურად კი, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროექტს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.