როგორც The Guardian წერს, მსოფლიოს რვა ყველაზე მდიდარი ადამიანის ქონება დედამიწის მოსახლეობის ღარიბი ნახევრის, ანუ 3.6 მილიარდი ადამიანის ქონებას უტოლდება.

სიღარიბესთან მებრძოლი ორგანიზაციების მოხსენების თანახმად, 2016 წელს რვა უმდიდრესი ადამიანის საერთო ქონებამ 420 მილიარდ დოლარზე მეტი შეადგინა, რაც დედამიწის მოსახლეობის ღარიბი 50%-ის საერთო ქონების ეკვივალენტია.

Oxfam-ის წინა წლის კვლევის თანხმად, საუბარი 62 ყველაზე მდიდარ ადამიანზე იყო, თუმცა ამასობაში დაზუსტდა, რომ ჩინეთში და ინდოეთში სიღარიბე ბევრად დიდ მასშტაბებს აღწევს, რაც არსებულ განსხვავებას ყველაზე მდიდრებსა და ყველაზე ღარიბებს შორის კიდევ უფრო აღრმავებს.

მსოფლიოს ეკონომიკურ ფორუმზე ასევე ითქვა, რომ მზარდი უთანასწორობა და სოციალური პოლარიზაცია გლობალური ეკონომიკის მთავარი საფრთხეებია.

მარკ გოლდრინგი, ოქსფამის აღმასრულებელი დირექტორი აცხადებს: ამ წლის სტატისტიკა კიდევ უფრო ზუსტი, ცხადი და შოკიმომგვრელია. 2015 წლიდან მოყოლებული, მსოფლიოს მოსახლეობის 1% მეტ ქონებას ფლობს, ვიდრე დანარჩენი მოსახლეობა. 1988 წლიდან 2011 წლამდე მსოფლიოს ყველაზე ღარიბი 10%-ის შემოსავალი მხოლოდ $65-ით გაიზარდა, ხოლო მდიდრებისა - $11,800-ით, რაც 182-ჯერ მეტია.

მოხსენებას გამოეხმაურა მარკ ლითლვუდი, ეკონომიკურ საქმეთა ინსტიტუტის გენერალური დირექტორი, რომელმაც აღნიშნა, რომ ოქსფამმა კიდევ ერთხელ შეადგინა რეპორტი, რომლის მიზანიც კაპიტალიზმის დემონიზებაა.

"მოხსენებაში გამოტოვებულია ის ფაქტი, რომ მხოლოდ გასულ წელს 100 მილიონმა ადამიანმა დააღწია თავი სიღარიბეს", - აცხადებს მარკ ლითლვუდი.

იმ რვა ადამიანის სია, რომელზეც მოხსენებაშია საუბარი, ასე გამოიყურება:

  • Microsoft-ის თანადამფუძნებელი ბილ გეითსი - $75 მილიარდი
  • ესპანურ ბრენდ Zara-ს დამაარსებელი ამანსიო ორტეგა - $67 მილიარდი
  • ინვესტორი უორენ ბაფეტი - $60,8 მილიარდი
  • კონგლომერატ Grupo Carso-ს მფლობელი კარლოს სლიმ ელუ - $50 მილიარდი
  • Amazon-ის დამფუძნებელი ჯეფ ბეზოსი - $45,2 მილიარდი
  • Facebook-ის დამფუძნებელი მარკ ცუკერბერგი - $44,6 მილიარდი
  • Oracle-ის მფლობელი ლარი ელისონი - $43,6 მილიარდი
  • ნიუ-იორკის ყოფილი მერი და Bloomberg-ის დამფუძნებელი მაიკლ ბლუმბერგი - $40 მილიარდი.