ქართული ოცნების აღმასრულებელი მდივანმა, ირაკლი კობახიძემ პარტიის საგანგებო ბრიფინგზე განაცხადა, რომ ნაციონალური მოძრაობისთვის ასეულობით ათასი ხმის მიღება შემაშფოთებელია და სამომავლოდ ცნობიერების ამაღლების კუთხით სერიოზული სამუშაოა ჩასატარებელი.

როგორ კობახიძემ განაცხადა, საერთაშორისო პარტნიორებმა არჩევნები დადებითად შეაფასეს და ამის ფონზე ოპოზიციის ქმედებები რეალობას აცდენილია.

"აშკარაა, რომ ძალაუფლების დაბრუნებისკენ ლტოლვა, რომლითაც ისინი თავის დროზე ბოროტად სარგებლობდნენ, არ აძლევს მათ ქართველი ხალხის მკაფიო არჩევანის ღირსეულად მიღების შესაძლებლობას.

სრულიად ლოგიკურია, რომ ქართველმა ამომრჩეველმა უარი უთხრა იმ პოლიტიკურ ძალას, რომელიც გამოირჩეოდა ზღვარგადასული თვითნებობით, კორუფციით, ადამიანების მკვლელობითა და წამებით, ბიზნესის რეკეტით, რომელმაც რუსეთის ფედერაციას დანაშაულებრივად ჩააბარა ქვეყნის ტერიტორიების 20 პროცენტი და ჩაიდინა უამრავი სხვა დანაშაული საკუთარი ქვეყნისა და ხალხის წინაშე. ამგვარი პოლიტიკური ძალის მიერ რამდენიმე ასეული ათასი ხმის მიღება თავისთავად სერიოზული შეშფოთების საგანია და ცნობიერების ამაღლების კუთხით, სამომავლოდ, სერიოზულ მუშაობას მოითხოვს", — განაცხადა კობახიძემ.

რაც შეეხება დაუბალანსებელი ოქმების საკითხს, კობახიძემ განმარტა, რომ მსგავსი რამ ყველა არჩევნებზე ფიქსირდებოდა, რაც ადამიანური შეცდომაა. მისივე თქმით, ერთი ფუნდამენტური არალეგიტიმური მოვლენა საარჩევნო აგიტაციაში მიხეილ სააკაშვილის ჩართვა იყო, რომელიც უცხო ქვეყნის მოქალაქეა და თავისუფლების აღკვეთა აქვს შეფარდებული.

"ჩვენ წინასწარ ვაცხადებდით, რომ არჩევნების შემდეგ რადიკალური ოპოზიცია უსათუოდ ეცდებოდა დესტრუქციას. აშკარაა, რომ ხალხის მხარდაჭერის არქონის ფონზე, ისინი არჩევნებში საკუთარ შანსს ვერ ხედავენ. სწორედ ამიტომ, დესტრუქცია არის მათთვის ერთგვარი ხავსი, რომელსაც ისინი 2012 წლიდან ეჭიდებიან", — ამბობს კობახიძემ.

ოპოზიციური პარტიები 31 ოქტომბრის არჩევნების შედეგებს არ აღიარებენ. ისინი არაერთ დარღვევაზე და გაყალბების ფაქტებზე საუბრობენ. ბარირგადალახული პარტიებმა უკვე განაცხადეს, რომ პარლამენტში შესვლას არ აპირებენ და აქციების მოწყობას გააგრძელებენ.