რესპუბლიკური პარტიის წევრის, თამარ კორძაიას განცხადებით, მათ წარმომადგენლებს 145 საჩივარი აქვთ დაწერილი. მისი თქმით, უმეტესობა კომისიის წევრებს შორის ფურცლების არასწორად გადანაწილებას, წილისყრის პროცედურების იგნორირებასა და ფუნქციების ისე შეცვლას ეხება, რომ ეს ჩანაწერთა წიგნში არ ფიქსირდება.

"კრწანისის ოლქში ნომერ მე-16 უბანზე დაფიქსირდა ერთი პირის მიერ, როგორც გადასატანი საარჩევნო ყუთით ხმის მიცემის ფაქტი, ასევე, ერთიანი სიით ხმის მიცემის ფაქტი. დაწერილია საჩივარი, პოლიცია იქნა გამოძახებული, მაგრამ ეს ადამიანი ვერ დააკავეს. ხარაგაულში გამოვლინდა ამომრჩეველთა მოსყიდვის ფაქტი. ჩვენი წარმომადგენელი ამზადებს საჩივარს. ჩვენს ხელთ არსებული მტკიცებულებებით დასტურდება კონკრეტულად ვის რამდენ თანხას უხდის დღეს ქართული ოცნება იმისათვის, რომ ხმები მოიპოვოს და მოაგროვოს. ასევე, ამ მტკიცებულებებით დასტურდება, რომ ხარაგაულის კონკრეტული უბანი და ოლქი ჩაბარებული აქვს ვინმე ლაშა ტალახაძეს, რომელიც არის სუს-ის თანამშრომელი", — განაცხადა კორძაიამ.

2020 წლის საპარლამენტო არჩევნების შესახებ

დღეს 31 ოქტომბერს, საქართველოს პარლამენტის არჩევნები იმართება. წელს პირველად, საარჩევნო სისტემა ყველაზე მეტად მიუახლოვდა სრულად პროპორციულს და არჩევნების 120/30 მანდატების თანაფარდობით ტარდება. აღნიშნული 8 მარტს ოპოზიციისა და მმართველ გუნდს შორის აშშ-ს ელჩის რეზიდენციაში გამართულ არაფორმალურ შეხვედრაზე გადაწყდა. იქვე, სამთავრობო გუნდი და ოპოზიცია, ასევე, შეთანხმდა, რომ პარტია, რომელიც 40%-იან მხარდაჭერას ვერ მოიპოვებს, მთავრობის დაკომპლექტებას ვერ შეძლებს. რაც შეეხება ბარიერს, იგი — 1%-ია.

მთელი ქვეყნის მასშტაბით საარჩევნო უბნები 8 საათზე გაიხსნა და ხმის მიცემის პროცესი დაიწყო. უბნები დღეს 20:00 საათზე დაიხურება.

ისტორიაში პირველად, არჩევნები პროპორციულთან მიახლოებული, 120/30-ზე სისტემით გაიმართება.

გაიგეთ მეტი არჩევნებზე: