საპარლამენტო უმრავლესობის წევრის, გიორგი კახიანის განცხადებით, ლელოს აქტივისტი, რაშიდ მუსაევი ქართული ოცნების მაჟორიტარ დეპუტატ სავალან მირზოევს სიტყვიერი შეურაცხყოფა მიაყენა და სიცოცხლის მოსპობით დაემუქრა. კახიანის თქმით, მიზეზი, მირზოევის პარტიულ კუთვნილება გახდა.

"ჩვენ არაერთხელ ვიხილეთ, თუ როგორც ცდილობს ოპოზიცია პროვოკაციების მოწყობას და საარჩევნო გარემოს ძალადობრივ რეჟიმში გადაყვანას. ფაქტია, რომ ქართული ოცნება არჩევნებში იმარჯვებს და ოპოზიციას სხვა არაფერი დარჩენია სიტუაციის რადიკალიზაციის გარდა. სავალან მირზოევმა ჩვენება უკვე მისცა გამოძიებას და იმედი გვაქვს, რომ გამოძიება დროული და ეფექტური იქნება", — განაცხადა კახიანმა ბრიფინგზე.

ლელოში ისნის მაჟორიტარი დეპუტატობის კანდიდატის, ლანა გალდავას თქმით, პირიქით, მათ აქტივისტზე აქეთ ძალადობდნენ და საგამოძიებო ორგანისთვის მიმართვასაც აპირებდნენ. თუმცა, გალდავა On.ge-სთან ამბობს, რომ ინფორმაციამ გაჟონა და ქართულმა ოცნებამ პრესკონფერენციის გამართვა დაასწრო.

"გიორგი კახიანმა გაიგო, რომ ხვალ ვაპირებდით პრესკონფერენციის გამართვას, სადაც ძალადობასა და ზეწოლაში ვაპირებდით გვემხილა ისინი, ამიტომ გადაწყვიტეს, დაეზღვიათ თავი და დაგვასწრეს პრესკონფერენცია. მათ დაირღვიეს უდანაშაულობის პრეზუმცია და ადამიანი უაპელაციოდ დამნაშავედ გამოაცხადეს", — ამბობს გალდავა.

შინაგან საქმეთა სამინისტროში On.ge-ს განუცხადეს, რომ მომხდარზე გამოძიება სისხლის სამართლის კოდექსის 151 მუხლით დაიყო, რაც მუქარას გულისხმობს.