საზოგადოებრივი მაუწყებლის დირექტორობის კანდიდატი, ირმა სოხაძე მაუწყებელს ესთეტიკას და "კარწინკას" [რუსული ტერმინი. ქართულად იგულისხმება გამოსახულება] უწუნებს და აცხადებს, რომ ხშირად სტუდიაში განათებებიც შეუსაბამოა.

"იგივე მოამბე — უზარმაზარი ფანტასტიური სტუდია გვაქვს და დიქტორი ზის, მიდებული აქვს თავი კედელზე და იქ არის ეკრანი, სადაც ბუზი სპილოსავით ჩანს. ნუ, მოკლედ, აბსოლუტური შეუსაბამობაა ვიზუალური. ახლა, ეს შეიძლება მაყურებელს არ აინტერესებს და ვერ ხვდება იქ რა ხდება, მაგრამ რომ არ მოსწონს თვალს "კარწინკა" ხო, ესთეტიკა ხო, ხომ ვიცით ეს სიტყვა?! ჩვენს არხს უნდა ჰქონდეს უმაღლესი ესთეტიკა", — განაცხადა მან საზოგადოებრივი მაუწყებლის საბჭოსთან გასაუბრებისას.

ამავდროულად, დირექტორობის კანდიდატი არხს წამყვანების ასაკს უწუნებს და ფიქრობს, რომ ეიჯიზმის ნიშნები ჩანს. მისი აზრით, ტელევიზიას უფრო ასაკოვანი წამყვანები სჭირდება, რადგან თინეიჯერები მაინც არ უყურებენ და თავად უფრო მეტად ენდობა ასაკიან ხალხს, ვიდრე "პირტიტველა, ლამაზ ბავშვებს".

გაიგეთ მეტი:

საზოგადოებრივი მაუწყებლის დირექტორის ხელფასი 4 ათასი ლარიდან 10 ათას ლარამდე გაიზრდება. გადაწყვეტილება თანამდებობრივი სარგოს გაზრდაზე სამეურვეო საბჭომ ერთხმად დაამტკიცა.

ამჟამად საზოგადოებრივ მაუწყებელში გენერალური დირექტორის პოზიციაზე შესარჩევი კონკურსი მიმდინარეობს. კონკურსის მეორე ტურში გადავიდნენ თინათინ ბერძენიშვილი, ირმა სოხაძე, ხათუნა ლაგაზიძე და ალექსანდრე ვახტანგოვი.

საზოგადოებრივი მაუწყებლის გენერალური დირექტორის თანამდებობა ვაკანტური მას შემდეგ გახდა, რაც ვასილ მაღლაფერიძემ თანამდებობა დატოვა. მაღლაფერიძის მტკიცებით, გადადგომის მიზეზი ის არის, რომ არ სურს წინასაარჩევნო პერიოდში გაჩნდეს კითხვები არხის მიკერძოებულობასთან დაკავშირებით.

გენერალურ დირექტორს თანამდებობაზე ნიშნავს სამეურვეო საბჭო ღია კონკურსის წესით, 6 წლის ვადით.