ამერიკელმა პოპვარსკვლავმა, მადონამ, განაცხადა, რომ თავის ცხოვრებასა და კარიერაზე ფილმის გადაღებას აპირებს, რომლის რეჟისორიც თავად იქნება.

მომღერალთან ერთად ფილმის სცენარზე ოსკაროსანი სცენარისტი, დიაბლო ქოუდი, მუშაობს, რომლის დაწერილიცაა ფილმები Juno და Young Adult.

ისტორია ფილმში, სავარაუდოდ, მადონას ცხოვრების ადრეული წლებიდან განვითარდება — ნიუ-იორკის ღარიბი უბნიდან მსოფლიო სუპერვარსკვლავობამდე, როგორ იქცა ჰიტებად Like a Virgin და Vogue.

თავად ხელოვანის განცხადებით კი, ფილმი, მეტწილად, სწორედ მუსიკაზე იქნება.

"მუსიკამ შემაძლებინა, ცხოვრება განმეგრძო, ხელოვნებამ კი სიცოცხლე მაჩუქა", — აცხადებს 62 წლის მომღერალი.

ავტობიოგრაფიული ფილმი, რომელსაც ჯერ სათაურიც კი არ აქვს, მადონასთვის პირველი კინონამუშევარი არაა. მან 2008 წელს Filth and Wisdom გადაიღო, 2011 წელს კი მომღერლის რეჟისურით გამოვიდა ფილმი WE, რომელიც მეფე ედვარდ VIII-ისა და უოლის სიმპსონის ურთიერთობას შეეხება.

ამ უკანასკნელს კრიტიკოსებმა დიდად არ უწყალობეს. ამასთან, ფილმმა მხოლოდ 2 მილიონი ამერიკული დოლარის გამომუშავება მოახერხა, მაშინ, როცა მისი ბიუჯეტი 11 მილიონს აღემატებოდა.

მიუხედავად ამისა, პოპ და როკვარსკვლავებზე შექმნილი ბიოგრაფიული ფილმები დიდი პოპულარობით სარგებლობს. გასულ წელს გამოსულ Rocketman-ს, რომელიც ელტონ ჯონის ცხოვრებაზე მოგვითხრობს და ფრედი მერკურის ისტორიაზე შექმნილ Bohemian Rhapsody-ის დიდი წარმატება ხვდა წილად — Queen-ის სოლისტის როლის შესრულებისთვის რამი მალეკმა ოსკარიც კი მიიღო.

ამჯერად, მადონას ფილმის გამომშვები კომპანია კინოსტუდია Universal Pictures იქნება, რომელმაც უწინ მომღერლის რისხვა დაიმსახურა არაოფიციალური სცენარის შეძენის გამო.

ჯერჯერობით უცნობია მსახიობების და პროდიუსერების ვინაობა, თუმცა პოპვარსკვლავმა ინსტაგრამის საკუთარ ანგარიშზე საინტერესო დეტალები გაამხილა.

გულშემატკივრებთან კითხვა-პასუხის ფორმატის საუბარში მომღერალმა ახსნა, რომ ფილმი შეეხება მისი "როგორც ხელოვანის, გადარჩენისთვის ბრძოლას კაცების სამყაროში". თავად ფილმი კი არაერთგვაროვანი ემოციებით იქნება დატვირთული: "ბედნიერება, სევდა, ბრაზი, სიგიჟე, სიკეთე, ბოროტება და სიმახინჯე".

მადონამ ასევე დასძინა, რომ ფილმში ვიხილავთ ისტორიებს ჟან-მიშელ ბასკიასთან მის ურთიერთობაზე, სკანდალურ სიმღერა Like a Prayer-სა და ფილმ Evita-ში შესრულებულ სამსახიობო როლზე.

"მსურს, ეკრანზე გადმოვცე ის საოცარი მოგზაურობა, რომლის შესაძლებლობაც მე, როგორც ხელოვანს — მომღერალს, მოცეკვავეს — ან, უბრალოდ, როგორც ადამიანს, მომეცა; მომეცა საშუალება, მსოფლიოში ჩემი გზა გამეკვალა", — ამბობს მადონა, — "ვფიქრობ, მნიშვნელოვანია, ჩემი ცხოვრების გიჟურ მოგზაურობაზე ჩემი ხმით და ხედვით მოვყვე".

მადონა, რომლის სრული სახელი მადონა ლუიზ ჩიკონეა, მსოფლიო პოპ-კულტურაში ერთ-ერთ საკულტო ფიგურად მიიჩნევა. მისი ბესტსელერად ქცეული ადრეული ალბომები, Like a Virgin, True Blue და Like a Prayer 1980-იან წლებში არსებულ სექსუალურ, რელიგიურ და რასობრივ ტაბუს შეეხება. ამასთან, მადონა მსოფლიოში ყველაზე გაყიდვადი სოლო მომღერალიცაა, რომლის სახელზეც 335 მილიონზე მეტი გაყიდული ჩანაწერია.