შერეული ორთაბრძოლების ირლანდიელი მებრძოლი კონორ მაკგრეგორი კორსიკაში, სექსუალური ძალადობის ბრალდებით დააკავეს და საპატიმროში გადაიყვანეს. ინფორმაციას Reuters ავრცელებს.

"10 სექტემბერს შემოსული საჩივრის მიხედვით, კონორ მაკგრეგორს ბრალი ედება სექსუალურ თავდასხმასა და უხამს ქცევაში. ის დაკავებულია", — აცხადებს კორსიკას ქალაქ ბასტიას პროკურატურა.

საქმეზე დამატებითი დეტალები უცნობია. მაკგრეგორის წარმომადგენელი უარყოფს, რომ მებრძოლს სამართალთან პრობლემები აქვს და ირწმუნება, რომ ის უდანაშაულოა:

"კონორი ბრალს არ აღიარებს. ის გამოკითხეს და უკვე გაათავისუფლეს".

მაკგრეგორი საფრანგეთის კუნძულზე საკუთარი იახტით იმყოფება და თავისუფალი დროის ნაწილს საცოლესთან და ორ შვილთან ერთად ატარებს. პარალელურად ის მარათონისთვის ემზადება, რომელიც წყლის უმიზნოდ გაფლანგვის წინააღმდეგ ცნობადობის გაზრდის კამპანიას ეძღვნება.

სპორტსმენმა პარასკევს დატვიტა, რომ მასთან ნარკოტესტირებაზე გამოცხადდნენ.

"სპორტიდან წავედი, თუმცა მოგცემთ ტესტის ჩატარების უფლებას" — დაწერა მან.

მაკგრეგორს კანონთან პრობლემები წარსულშიც ჰქონდა. 2018 წელს ის ბრუკლინში, ხაბიბ ნურმაგომედოვის ავტობუსზე ჯგუფური თავდასხმის ორგანიზებისთვის დააკავეს, გასულ წელს კი, დუბლინის ბარში მოწყობილი ჩხუბის გამო უჩივლეს.

კონორ მაკგრეგორი UFC-ის ეგიდით ასპარეზობდა. გასული წლის მარტში განაცხადა, რომ შერეულ ორთაბრძოლებში (MMA) კარიერას ასრულებდა, რაც ასევე სექსუალური ძალადობის ბრალდებებს უკავშირდებოდა. მოგვიანებით, მან გადაწყვეტილება შეცვალა და 2020 წლის იანვარში რინგზე დონალდ სერონს შეებრძოლა, 2020 წლის ივნისში კი, ხელმეორედ განაცხადა, რომ კარიერას ასრულებდა, თუმცა ვარაუდობენ, რომ ოქტაგონზე კვლავ დაბრუნდება.