ორმა მეგობარმა 2010 წელს ქართული ხელნაკეთი სამკაულის ბრენდი Coquette შექმნა. თუმცა, ეს ყველაფერი ასე მარტივი არ ყოფილა — მაშინ ისინი თეატრალურ უნივერსიტეტში მოდელირებას სწავლობდნენ და თავისუფალ დროს საკუთარი თავისთვის სამკაულებს ამზადებდნენ. სამკაულები კი ძალიან უცხო და გამორჩეული იყო — როგორც ერთ-ერთი დამფუძნებელი გვიყვება, ქუჩაში უცხოებიც კი აჩერებდნენ, ნაკეთობებით ინტერესდებოდნენ და უამრავ კომპლიმენტს ეუბნებოდნენ. სწორედ აქედან წამოვიდა კომპანიის შექმნის იდეაც.

"ჩვენით ვისწავლეთ ყველანაირი ტექნიკა, მასალებიც კი არ იშოვებოდა მასობრივად მაშინ და ყველაფერი ამერიკიდან გამოვიწერეთ, დავიწყეთ ნამუშევრების შექმნა და შეგროვება. სამი თვის თავზე კი პირველი გამოფენაც მოვაწყვეთ შარდენზე. ძალიან დიდი მოწონება დაიმსახურა როგორც უცხოელებისგან, ისე ქართველებისგან და ყველაფერი გაიყიდა", — გვიყვება მაიკო გაგუა, კომპანიის დამფუძნებელი.

ფოტო: Coquette

სწორედ ამ გამოფენის შემდეგ გადაწყვიტეს, რომ არ იქნებოდა ურიგო, ეს ნივთები საგამოფენო სივრცეს გასცდენოდა და ფართო საზოგადოებისთვისაც გაეხადათ ხელმისაწვდომი. ასე დაიბადა მაღაზიის შექმნის იდეაც. მათ მალევე გახსნეს მაღაზია Coquette, რომლის სახელი ფრანგული სიტყვიდან მომდინარეობს და კეკლუც ქალს ნიშნავს.

"ყველაფერი ძალიან კარგად მიდიოდა, ჩვენი სახელოსნოც გვქონდა, სადაც ვმუშაობდით, შეკვეთებს ვიღებდით, მოდიოდნენ მომხმარებლები საქორწილო კაბების გასაფორმებლად თუ სხვა გამორჩეული დღეების გასალამაზებლად", — ამბობს მაიკო.

Coquette-ს დახვეწილი სტილი გამოარჩევს. ისინი შერეულ მასალას: ქსოვილებს, ქვებს, თვლებსა თუ მეტალებს იყენებენ. მომხმარებლებისგანაც ხშირად გაუგიათ, რომ კოკეტის აქსესუარს უნიკალური ხელწერის გამო ცნობენ და სხვა სამკაულებისგან გამოარჩევენ.

"ძალიან დიდი მოთხოვნაა საბავშვო თმის სამაგრებზე. ამ ეტაპზე ეს ჩვენი ძირითადი ხაზია და ვამზადებთ შეკვეთით, ტანისამოსის ფერის და სტილის მიხედვით, გარდა ამისა, ვამზადებთ სადღესასწაულო და ყოველდღიურ თმის აქსესუარებს, ვმუშაობთ საქორწილო კაბის დიზაინზე, გაფორმებაზე და მოქარგვაზე", — ამბობს მაიკო.

პანდემიამ Coquette-ს ისევე, როგორც ყველა მცირე ბიზნესს განსაკუთრებული ზიანი მიაყენა. 3 თვის განმავლობაში კომპანია სრულიად გაჩერებული იყო. დაიკეტა მაღაზია და მასალის უქონლობის გამო შეკვეთებსაც ვეღარ ამზადებდნენ. თუმცა, სტენდი ახლახან, თბილისში, ქავთარაძეზე, სითი მოლში ისევ გახსნეს და მომხმარებლებს მოუთმელად ელიან.

Coquette-ის ნამუშევრების დასათვალიერებლად და შეკვეთისთვის ესტუმრეთ მათ ფეისბუქ გვერდს.