იუსტიციის უმაღლესმა საბჭომ უზენაესი სასამართლოს მოსამართლის თანამდებობაზე ასარჩევად, პარლამენტისათვის წარსადგენი კანდიდატი ლევან თევზაძე შეარჩია.

სააპელაციო სასამართლოს მოსამართლემ, ლევან თევზაძემ სექტემბერში ინტერესთა კონფლიქტის გამო კანდიდატურა მოხსნა, თუმცა ნოემბერში ისევ უზენაესის მოსამართლეობის პრეტენდენტი გახდა. ამჟამად, ვინაიდან პარლამენტში ვასილ როინიშვილი იყო წარდგენილი უზენაესი სასამართლოს მოსამართლედ და იგი საკონსტიტუციო სასამართლოს მოსამართლე გახდა, დარჩენილ კანდიდატებში ლევან თევზაძე მოხვდა.

საბჭოს არამოსამართლე წევრი, ნაზი ჯანეზაშვილი On.ge-სთან საუბარში აღნიშნავს, რომ ლევან თევზაძე ძალიან გავლენიანი პირის, ირაკლი შენგელიას ცოლის ძმაა:

"შენგელია არის ჩინჩალაძის მოადგილე და მისი მარჯვენა ხელი. [ლევან] მურუსიძესა და [მიხეილ] ჩინჩალაძეს იერარქიულად თუ შევხედავთ, შემდეგი ეს ადამიანია".

ნაზი ჯანეზაშვილი ინტერესთა კონფლიქტზე კონკურსის მიმდინარეობისას საუბრობდა და ამბობდა, რომ საბჭოს მოსამართლე წევრის, ირაკლი შენგელიას მოსამართლეების შერჩევის პროცესში მონაწილეობა სწორედ ამ მიზეზით არ უნდა მიეღო.

თავად თევზაძე მიიჩნევს, რომ ის კონკურსის ყველა პირობას აკმაყოფილებდა, თუმცა კანდიდატურა მაშინ მაინც მოხსნა.

"მხედველობაში მივიღე მიმდინარე პროცესის მნიშვნელობა სასამართლო სისტემისთვის და მიზანშეწონილად მივიჩნიე, მიმემართა იუსტიციის უმაღლესი საბჭოსათვის კანდიდატურის მოხსნის თაობაზე, რათა ჩრდილი არ მიადგეს ამ ისტორიულ პროცესს", — ამბობდა მოსამართლე პირველი გასაუბრების შემდეგ.