ქართული ოცნების დეპუტატი, გიორგი კახიანი მთავარი არხის ერთ-ერთი მეწილის, გიორგი რურუას პატიმრობაში დარჩენას გამოეხმაურა. მისი თქმით, სასამართლო თავის გადაწყვეტილებებში დამოუკიდებელია.

"ეს არის სასამართლოს გადაწყვეტილება. პროცესი გრძელდება, ვნახოთ, საბოლოო ჯამში რა გადაწყვეტილებას მიიღებს სასამართლო. ამ ეტაპზე სასამართლოს, როგორც ჩანს, არ ჰქონდა სამართლებრივი საფუძველი, რომ შეცვლილიყო აღკვეთი ღონისძიება", — აღნიშნა კახიანმა.

რურუა ერთ-ერთია იმათგან, ვის გათავისუფლებასაც ოპოზიცია 8 მარტის შეთანხმების ფარგლებში ითხოვს. დღეს, 18 მაისის სასამართლო პროცესზე დაცვის მხარემ აღკვეთი ღონისძიების გაუქმება მოითხოვა, თუმცა მოსამართლემ რურუა ისევ პატიმრობაში დატოვა.

ევროპული საქართველოს წევრი, ელენე ხოშტარია ამბობს, რომ მნიშვნელობა არ აქვს რურუას როგორ და როდის გაათავისუფლებენ, მთავარია ეს სწრაფად მოხდეს. მისივე თქმით, რურუას გათავისუფლება პოლიტიკური პროცესების დასტაბილურებას შეუწყობს ხელს.