გადაცემა რეაქციის წამყვანი ინგა გრიგოლია პირდაპირ ეთერში ცომს ზელს. ამ ფორმით გააპროტესტა მან მოძრაობა ლელოს დამფუძნებლის, მამუკა ხაზარაძის სექსისტური განცხადება და ზოგადი სტერეოტიპული გარემო, რომელიც ქვეყანაშია.

"მინდა მარტივად გიჩვენოთ, ბატონებო, როგორ ვმუშაობთ და როგორ ვცხოვრობთ ჩვენ ქალები. ახლა საგანგებოდ მაქვს სტუდიაში წამოღებული, ისე, უბრალოდ, ილუსტრაციისთვის. რა თქმა უნდა, წინსაფარი არ მქონდა იმიტომ, რომ არ ვიცოდი, რომ დღეს ამ თემაზე მომიწევდა საუბარი.

მინდა, რომ, უბრალოდ, გაჩვენოთ, როგორი მარტივია, როდესაც ქალი ჯერ ცომს მოზელს, შემდეგ ხაჭაპურს გამოაცხობს, ან რაიმე სხვას და ამის შემდეგ მოვა სამსახურში და იმ პოლიტიკოსების საქმიანობის გაშუქებას დაიწყებს, რომელზეც ჩვენ ვსაუბრობთ მთელი დღის განმავლობაში.

მოკლედ, ჩემი დილა იწყება ხოლმე ასე: ვიღვიძებ, ვიწყებ სახლის საქმეების კეთებას, თუ საჭიროა, ცომის ამოზელვაზეც არ ვამბობ უარს. როდესაც, სამზარეულოს საქმეებს მოვრჩები ხოლმე ვალაგებ სახლს, ვემზადები და ამის შემდეგ მოვდივარ სამსახურში, ბატონებო, რომლებსაც გგონიათ, რომ ქალი მხოლოდ "კუხნაში" უნდა იყოს. როდესაც ცომს ვზელ, ამ დროს ვფიქრობ ხოლმე ჩემი გადაცემის თემებზე და იმაზე, თუ რა კითხვა უნდა დავუსვა გადაცემის რესპონდენტებს.

სამსახურში მოვდივარ, სტუდიაში შევდივარ. მშვიდად ვარ იმით, რომ სახლში ყველაფერი წესრიგში მაქვს და ვამბობ: საღამომშვიდობისა, პირდაპირ ეთერშია რეაქცია, რომელსაც ყოველ სამშაბათს და ხუთშაბათს წარმოგიდგენთ ჟურნალისტი ინგა გრიგოლია. აი, ასეთები ვართ ქალები საქართველოდან", — განაცხადა მან.

დღეს, 3 ოქტომბერს თიბისი ჯგუფისა და მოძრაობა ლელოს დამფუძნებელმა, მამუკა ხაზარაძემ ინფრასტრუქტურის მინისტრის გასაკრიტიკებლად სექსისტური გამონათქვამი გამოიყენა.

"მაია ცქიტიშვილს, წარმოდგენა არ აქვს, რა არის ინფრასტრუქტურა. შეიძლება, კარგად აცხობს ხაჭაპურს, მაგრამ მე არ ვიცი მას რა გამოცდილება ჰქონდა წინა ცხოვრებაში, როცა მილიარდებს აბარებენ..."

პასუხად ცქიტიშვილმა თქვა, რომ ხაზარაძისგან განსხვავებით, კარგად აცხობს ხაჭაპურს და კარგად აკეთებს მის საქმეს. მან ახალგაზრდა გოგოებს მოუწოდა, არ შეუშინდნენ ასეთი ტიპის განცხადებებსა და დამოკიდებულებას, ისწავლონ, გააკეთონ ის საქმე, რაც უყვართ და მიხედონ თავის ოჯახსა და ქვეყანას.

ამავე თემაზე: