10 მითი ფულის შესახებ

მოგვწონს თუ არა, ფულს ჩვენს ცხოვრებაში მნიშვნელოვანი ადგილი უჭირავს — მისი გამომუშავებისთვის დიდ დროსა და ენერგიას ვხარჯავთ და ასევე მას უნდა ვუმადლოდეთ, რომ ყველა ის სიკეთე შეგვიძლია ვიქონიოთ, რაც კაცობრიობას ოდესმე გამოუგონია.

ფულთან მიმართებაში პრაგმატული დამოკიდებულებების გარდა კი საზოგადოებაში ბევრი გაცვეთილი მითიც არსებობს, რომელთა მსხვრევას, აქვე, თქვენთან ერთად შევეცდებით.

აი, 10 მითი ფულის შესახებ:

1. რომ სახლის რომელიმე კუნჭულში დამალავ და დაგავიწყდება

არადა, თუ დაგვჭირდა გუგლის რუკაზეც კი ვიპოვით თითოეულ ასეთ სამალავს. თან განახლებულ Apple Maps-ს უკვე 360-გრადუსიან ხედი და საყვარელი ადგილების მონიშვნის ფუნქციაც დაემატა.

2. მითს გვიყვება ყველა, ვინც 20 ლარის სესხებას გვთხოვს და დაბრუნებას გვპირდება

ოდესმე გიფიქრიათ ყველა გასესხებული 20-ლარიანი რომ ერთბაშად დაგვიბრუნონ, რა კარგ დროს გაატარებდით უცებ?

3. მითია, თითქოს სახლიდან ლანჩს თუ მოიტან, ხელფასი მთელი თვე გეყოფა

მოკლედ, არ არის ასე.

4. თითქოს ისე მარტივად იშოვება, რომ ტრანსპორტში ან კინოში ჩვენს ნაცვლად სიხარულით იხდიან

აი, თურმე სად მიდის სამსახურში ლანჩზე დაზოგილი ფული...

5. ხურდები ძალიან მძიმე და რთულად სატარებელი რომ არის

სინამდვილეში ისეთი საგანგაშო არაფერი ხდება, რომ ხურდებზე კატეგორიული უარი ვთქვათ.

ნუ, თან თუ ძალიან ბევრი ხურდა დაგროვდა, საფულეს გარდა ხომ შეგვიძლია ნაწილი მანქანაში, ჩანთაში ან სამუშაო მაგიდის უჯრაში შევინახოთ.

6. ყველაფერი იმიტომ ძვირდება, რომ ლარი თავისუფალი თინეიჯერია

ამ შესანიშნავი მითის ავტორი ნიკოლოზ ალავიძეა.

7. ბევრ ფულს ადამიანის გაფუჭება რომ შეუძლია

არა, ფულით ახალი ტანსაცმლის ან სავარჯიშო დარბაზის აბონემენტის ყიდვის, სწავლის დაფინანსების, სხვების დახმარების და იმდენი კარგი რამის გაკეთება შეიძლება, რომ ეგ ვერსია თამამად შეგიძლიათ გამორიცხოთ.

8. 100 ლარის 10-ლარიანებად დაშლით რომ მეტი ფული გამოდის

რაოდენობით კი, მაგრამ მყიდველობითი უნარის ამბავში არაფერი იცვლება. თუ არ გჯერათ, გადაამოწმეთ.

9. ძველი 50-თეთრიანები რომ ძვირად იყიდება

ამ ბიზნესით გამდიდრებული ჯერ ჩვენ არავინ გვინახავს, თქვენ?

10. ნაპოვნი ფული რომ "ქარის მოტანილია და ქარი წაიღებს"

ჰო, ის ჩიფსები და შოკოლადები სულ ქარმა შეჭამა. კი, როგორ არა.

ბოლო ამბები:

გირჩევთ