რუსთავი 2-ის ყოფილი ფინანსური დირექტორის, კახაბერ დამენიასა და სარეკლამო კომპანია ინტერმედია პლიუსის დირექტორის, ზურაბ იაშვილის ადვოკატი ბექა ბასილაია აცხადებს, რომ წარდგენილი ბრალდებები აბსურდულია. მისი თქმით, დამენიას ედავებიან თანხის გაფლანგვას და ბრალშივე წერია, რომ გაიფლანგა "მიუღებელი თანხა".

"თუ თანხა კომპანიას არ ჰქონდა, ის არ ჩაითვლება მართლზომიერ მფლობელობაში არსებულად ანუ ვერც გაიფლანგებოდა. დამენიასთვის წარდგენილი ბრალდება იურიდიულად არის ნონსენსი", — აცხადებს ის.

მისი თქმით, დამენია სამედიცინო მიზნებით თურქეთში არის წასული და 15 სექტემბრამდე დაბრუნდება ქვეყანაში.

გარდა ამისა, ბასილაია ამბობს, რომ იაშვილის ბრალდება ეხება კომერციულ მოსყიდვას და დაუსაბუთებელია თუ ვინ მოისყიდა. მისი თქმით, ბრალის დადგენილებაში ერთი ჩვენებაც არ არის, ერთი მოწმეც კი არ ახსენებს იაშვილი მოისყიდა ვინმემ თუ იაშვილმა მოისყიდა.

"ყალბი დოკუმენტის ბრალიც აბსურდია, ტრანზაქცია არის ბანკით განხორციელებული, ბანკშია თანხა შესული და ვის წარმოუდგენია რომ ბანკის სალაროს შემოსავლოს ორდერი გაყალბებულიყოს", — განაცხადა მან.

პროკურატურამ დამენიას ბრალი რუსთავი 2-ის ქონების ჯგუფურად მართლსაწინააღმდეგოდ გაფლანგვის მოტივით წაუყენა, ზურაბ იაშვილს კი კომერციული მოსყიდვისა და ყალბი ოფიციალური დოკუმენტის გამოყენებით კომპანიისთვის მნიშვნელოვანი ზიანის მიყენების მოტივით. ამავე საქმეზე კიდევ ერთი ბრალი წაუყენეს რუსთავი 2-ის ყოფილ დირექტორს, ნიკა გვარამიას.

პროკურატურის ვერსია

საგამოძიებო უწყების ინფორმაციით, ტელეკომპანია რუსთავი 2-ის მაშინდელი გენერალური დირექტორი, ნიკა გვარამია სარეკლამო კომპანია ინტერმედია პლუსისგან თანხას "ბაზარზე დამკვიდრებული პრაქტიკით" იმ დრომდე ითხოვდა, სანამ არხის დასაბრუნებლად დავას ქიბარ ხალვაში დაიწყებდა და წილები დაყადაღდებოდა. პროკურატურის ვერსიით, ამ დროიდან გვარამიამ სარეკლამო კომპანიისგან არსებობისათვის საჭირო მინიმალური ოდენობის თანხის მოთხოვნა დაიწყო.

"საერთო ჯამში, ნიკა გვარამიამ და კახაბერ დამენიამ, 2014 წელს ანალოგიურ მომსახურებაზე გაფორმებული ხელშეკრულების ფარგლებში მიღებულ თანხებთან შედარებით (სულ 43 230 509 ლარი), შპს სამაუწყებლო კომპანია რუსთავი 2-ზე კომერციული რეკლამის განთავსების უფლების დათმობის სანაცვლოდ, 2015 წლის იანვარში გაფორმებული ხელშეკრულების ფარგლებში, მოითხოვეს მხოლოდ 36 467 000 ლარის ანაზღაურება, რითაც მართლსაწინააღმდეგოდ გაფლანგეს შპს ინტერ მედია პლიუსისგან 6 763 509 ლარის მოთხოვნის უფლება", — აცხადებენ პროკურატურაში.

მათივე ინფორმაციით, ამის სანაცვლოდ ნიკა გვარამიამ ინტერმედია პლიუსის დირექტორის დახმარებით მიიღო თბილისში მდებარე ორი ბინა. პროკურატურის ვერსიით, გვარამიამ თავად შეარჩია ორივე ბინა, თუმცა ის ჯერ ინტერმედია პლიუსის საკუთრება გახდა, მოგვიანებით კი სესხის ფიქტიური ხელშეკრულებით მასე გადაფორმდა.