პოლიტიკურმა პარტია გირჩმა მაუწყებლობა დაიწყო. Girchi TV ეთერში 21 აგვისტოს მაგთის საკაბელოზე, 61-ე არხზე გაეშვა. პარტიის განცხადებით, მიმდინარეობს მოლაპარაკებები და უახლოეს პერიოდში Girchi TV-ის ყურებას სილქ ტვ-ის მომხმარებლებიც შეძლებენ.

პარტიის ლიდერი ზურა ჯაფარიძე განმარტავს, რომ სურთ საქართველოს მოსახლეობის ისეთ სეგმენტზე გასვლა, რომელიც დღემდე პოლიტიკური ხასიათის ინფორმაციას იღებს ტელევიზორიდან და არა ინტერნეტიდან.

აქვს თუ არა გირჩს მაუწყებლობის უფლება

მაუწყებლობის შესახებ კანონის 37-ე მუხლის მე-2 ნაწილის თანახმად, მაუწყებლობის სფეროში ლიცენზიის მფლობელი/ავტორიზებული პირი არ შეიძლება იყოს პოლიტიკური პარტია ან პოლიტიკური პარტიის თანამდებობის პირი. კითხვაზე, თუ რატომ მიანიჭეს ავტორიზაცია გირჩის ტელევიზიას, კომისიაში პასუხობენ, რომ ავტორიზაციას ანიჭებენ ნებისმიერ მსურველს, რომლის განაცხადით მაუწყებლობის შესახებ საქართველოს კანონმდებლობით მოთხოვნილ ინფორმაციასთან სრულ შესაბამისობაშია.

ავტორიზაციის მინიჭების გადაწყვეტილებაში ვკითხულობთ, რომ შპს გირჩი ტვ-ის დირექტორი და 100%-იანი წილის მფლობელი ცოტნე კობერიძეა. აქვე წერია, რომ კობერიძე არ წარმოადგენს, პოლიტიკურ პარტიას და არ არის პარტიის თანამდებობის პირი. კომისიის განცხადებით, მათ გადაამოწმეს და კობერიძეზე მონაცემები ვერ აღმოაჩინეს ვერც თანამდებობის პირთა ქონებრივი დეკლარაციებში და ვერც მოქალაქეთა პოლიტიკური გაერთიანებების (პარტიების) რეესტრში.

გარდა ამისა, კომისია აღნიშნავს, რომ ცოტნე კობერიძე ესწრებოდა ერთ-ერთ სხდომას, სადაც საკუთარი პასუხისმგებლობით დაადასტურა, რომ გირჩი ტვ-ის დამფუძნებლები არ არიან პოლიტიკური პარტიის წევრები. კომისიამ ზემოაღნიშნულის გათვალისწინებით მიიჩნია, რომ შპს გირჩი ტვ-ის მაუწყებლად ავტორიზაცია შესაძლებელია.

მართალია, კომისია ამტკიცებს, რომ კანონი არ ირღვევა, მაგრამ ახალ არხს პოლიტიკური პარტიის სახელი ჰქვია, იყენებს ამავე პარტიის ლოგოსა და ოფისს. დირექტორი კი არ მალავს, რომ გირჩის წევრია, თუმცა არა "კანონის თვალსაზრისით."

როგორც ცოტნე კობერიძე On.ge-სთან განმარტავს, ის არ არის რეგისტრირებული, როგორც პარტიის წევრი. არ უარყოფს, რომ ხშირად პოზიციონირებდა სხვადასხვა გადაცემსა და შეკრებებზე გირჩის წევრად, მაგრამ კანონი ამ შემთხვევაში მას ტელევიზიის ფლობას არ უკრძალავს.

კობერიძე On.ge-სთან საუბარში ამბობ, რომ არასწორად მიაჩნიათ პოლიტიკური პარტიებისთვის ტელევიზიის ფლობის უფლების შეზღუდვა. მისი თქმით, გირჩმა მაუწყებლობის უფლება "სულელური კანონით" მიიღო.

"ბევრი კანონი გვგონია სულელური. ასეთ კანონს ის ახასიათებს, რომ ტოვებს რაღაც ხვრელებს, რომლიდანაც სრულიად კანონიერად შეგიძლია იმოქმედო... იაგო ხვიჩიას სურდა თავიდან [დირექტორობა], მაგრამ არ ჰქონდა ამის უფლება, მე კი მქონდა. რადგან არსებობს იმის საშუალება, რომ არხი დაარეგისტრირო და პარტიასთან იყო აფილირებული, მაგრამ კანონი არ დაარღვიო, ცხადია, ეს გამოვიყენეთ", — ამბობს ის.

Girchi TV-ის სამაუწყებლო ბადე, ლოგო, სლოგანი და დაფინანსება

ამ ეტაპზე არხს დეტალურად გაწერილი სამაუწყებლო ბადე არ აქვს, თუმცა ცნობილია რომ ეთერში გავა გადაცემები, რომლებსაც პარტია ფეისბუქგვერდზე უშვებდა. მათ შორისაა თავისუფალი ბაზარი და გირჩის აზრით.

"გვინდა, რომ გირჩის არხი იყოს საინტერესო და საინფორმაციო სივრცე, იდეოლოგიური დატვირთვით. ამ მხრივ ჩვენი პლატფორმა ღიაა და გვინდა ბადე შევავსოთ ახალი გადაცემებით. ყველას, ვისთანაც გვაქვს იდეოლოგიური თანხვედრა, მივცემთ საშუალებას, რომ ჩვენი არხი გამოიყენოს თავისი იდეების გასავრცელებლად", — ამბობს ის.

ტელევიზიის ლოგო პარტიის იდენტურია, მცირედი ცვლილებით — ფონი თეთრია და მარჯვენა ქვედა კუთხეში TV აწერია.

რაც შეეხება სლოგანს, ამ კითხვაზე დირექტორი გვპასუხობს: "მეტი თავისუფლება არის გირჩის სლოგანი და არხის სლოგანიც, ალბათ, ეგ არის".

ახლანდელი მდგომარეობით არხი პარტიის დაფინანსებაზეა, თუმცა სურთ შემოსავლების გაზრდა და რეკლამების გაშვება.