უფლებადამცველ ვიტალი საფაროვის მკვლელობისთვის ბრალდებულებს გიორგი სოხაძესა და ავთანდილ კანდელაკიშვილს მოსამართლემ 15-15-წლიანი პატიმრობა მიუსაჯა. მოსამართლე შორენა გუნცაძემ განაჩენი დღეს, 27 ივნისს გამოაცხადა.

"მე მკვლელი არ ვარ და დამაბრალეს ყველაფერი მედიამ და პროკურატურამ", — განაცხადა გიორგი სოხაძემ საბოლოო სიტყვისას.

მოსამართლემ დადასტურებულად არ მიიჩნია, რომ საფაროვი ეროვნული შეუწყნარებლობის მოტივით მოკლეს. დაცვის მხარე ამ განაჩენის გასაჩივრებას განიხილავს.

"დაპირისპირებული მხარე იყო მისი ორი თანმხლები პირი. მათ განაცხადეს, რომ თუ ვინმე უნდა მოეკლათ, ისინი უნდა მოეკლათ, [რადგან] ვიტალი საერთოდ არ ერეოდა ჩხუბში. იგი ცდილობდა სიტუაციის განმუხტვას და მხოლოდ მას შემდეგ წამოვიდა მათგან აგრესია, რაც გაუგეს, რომ ის იყო ებრაელი და მუშაობდა არასამთავრობო ორგანიზაციაში", — თქვა საფაროვის ოჯახის ინტერესების დამცველმა.

საფაროვის მკვლელობა

სოხაძესა და კანდელაკიშვილს ბრალი ედებოდათ ჯგუფურად განზრახ მკვლელობაში ეროვნული შეუწყნარებლობის მოტივით. თავდაპირველად, მათ ბრალი წარდგენილი ჰქონდათ განზრახ მკვლელობის მუხლით, თუმცა პროკურატურამ ბრალი დაამძიმა. ამასთან დაკავშირებით დაცვის მხარე აცხადებს, რომ პროკურატურამ გადაწყვეტილება არაკვალიფიციურად მიიღო. ორივე ბრალდებულმა ნაფიც მსაჯულთა სასამართლოზე უარი განაცხადა.