22 სექტემბერს ABC-ის ეთერში ერთ-ერთი ყველაზე პოპულარული სერიალი გრეის ანატომია მე-13 სეზონით დაბრუნდა.

დანარჩენი ნაწილი შეიძლება სპოილერს შეიცავდეს, ამიტომ თუ სერიალი ნანახი არ გაქვთ კითხვა დაუყოვნებლივ შეწყვიტეთ!

შოუს შემქმნელი შონდა რაიმსი, აგერ უკვე 13 წელია ჩვენს საყვარელ პერსონაჟებს დაუნდობლად ასალმებს სიცოცხლეს. ვინაიდან არსებობს შანსი, რომ სადღაც ცხოვრობს ადამიანი, რომელსაც სერიალი ჯერ არ აქვს ნანახი, არც ჩემი რჩევა გაითვალისწინა და სტატიის კითხვა გააგრძელა, გამოვიჩენ კეთილ ნებას და არ დავასპოილერებ, არ ვეტყვი ვინ როდის და რატომ მოკლა სერიალის შემქმნელმა.

სანდრა ოს პერსონაჟი ქრისტინა იანგი სერიალის ერთ-ერთი სავიზიტო ბარათი და, შეიძლება ითქვას, მთავარ გმირ მერიდიტ გრეიზე პოპულარულიც კი იყო, თუმცა მეათე სეზონის ბოლოს ცნობილი გახდა რომ ის შოუს ტოვებდა.

უამრავი თხოვნის, მოთხოვნის, პეტიციის, გაფიცვის, კარვების დაცემის შემდეგ, არც შონდამ და არც სანდრამ ყური არ შეიბერტყეს და ჯერ-ჯერობით სერიალი არაჩვეულებრივი იანგის გარეშე აგრძელებს ცხოვრებას.

ფოტო: abc

მაგრამ, ამერიკული ტელევიზიისა და კინოს კულუარებიდან ცნობილი გახდა, რომ სანდრა ომ გრეიში დაბრუნება გადაწყვიტა.

ჭორებს კიდევ უფრო მეტად შეუწყო ხელი მსახიობ კევინ მაკკიდის განცხადებამ. კევინი შოუში ექიმ ოუენ ჰანტის როლს ასრულებს, რომელთან ერთადაც ქრისტინა იანგმა ბევრი კარგი დღე გაატარა.

ფოტო: abc

"ბედნიერი ვიქნები თუ სანდრა დაბრუნდება, რამდენიმე ეპიზოდით მაინც, ან იქნებ სულ დაბრუნდეს, ვინ იცის?! ქრისტინა ერთ-ერთი საუკეთესო პერსონაჟი იყო სერიალში, სანდრა კიდევ ყველას ძალიან გვიყვარს და რეგულარულად ვხვდებით. ეჭვი მაქვს, ის მალე კვლავ ჩვენთან იქნება", ამბობს ინტერვიუში კევინ მაკკიდი.

ქრისტინას პერსონაჟის დაბრუნებაზე საკუთარი პასუხი აქვს სანდრა ოსაც:

"არ ვიცი ვინ და რატომ წამოიწყო ეს ჭორები, მაგრამ ჯერ-ჯერობით ჩემს გეგმებში სერიალში დაბრუნება არ შედის, ყოველ შემთხვევაში მეცამეტე სეზონში, მერე ვნახოთ."

წელს გრეის ანატომიას ქრისტინას გარეშე ვნახავთ, თუმცა, როგორც ცნობილია, შონდა რაიმსმა სანდრას, რომელიც შოუდან მიდიოდა სპეციალური კონტრაქტი გააფორმებინა, რომლის მიხედვითაც ის აუცილებლად დაბრუნდება სერიალში, თუმცა ეს იქნება სერიალის ბოლო სეზონი.

მაგრამ იმედს მაინც არ ვკარგავთ, ამის მიზეზად კი სანდრას კომენტარის ბოლო ფრაზაა - "ჩემს გეგმებში სერიალში დაბრუნება არ შედის, ყოველ შემთხვევაში მე-13 სეზონში, მერე ვნახოთ."

ფოტო: abc

ასეა თუ ისეა, ყველას სახელით, ვისაც ქრისტინა გვიყვარს ვამბობ, რომ ჩვენ ქრისტინა გვჭირდება, ის ჩვენი ადამიანია.