თბილისის საერთაშორისო თეატრალური ფესტივალი ინდური დასის მონაწილეობით, ქორეოგრაფიული სპექტაკლით "შიგნიდან," გაიხსნა.

წარმოდგენა კოტე მარჯანიშვილის სახელობის თეატრის დიდი სცენაზე შედგა. ქორეოგრაფმა ადიტი მანგალდისმა თერთმეტი მოცეკვავისგან შემდგარ გუნდთან ერთად თითქმის ორ საათიანი სპექტაკლი წარმოადგინა. მან ორმოქმედებიანი სპექტაკლის კონცეფცია ადამიანის ემოციებზე ააგო და თითოეულ მათგანს დაარქვა - "გაკვანძული" და "გახსნილი".

ფოტო: გვანცა ნემსაძე / On.ge

ადიტი მანგალდისი არის კლასიკური ინდური საცეკვაო ფორმის კათაკის წამყვანი შემსრულებელი.

სპექტაკლის შესახებ ქორეოგრაფის ჩანაწერიდან ვკითხულობთ:

"სპექტაკლის "შიგნიდან" დადგმაზე მუშაობა ჩემი სხვა ნამუშევრებისაგან ძალიან განსხვავებული რამ იყო. ეს იყო საკუთარ თავში ჩაღრმავებისა და შინაგანი ემოციების კვლევის ხშირად შემაშფოთებელი პროცესი. რაღა თქმა უნდა, კომფორტის ზონის დატოვება ხშირად მიხდებოდა. სწორედ ამ მოგზაურობაში გიწვევთ ჩვენთან ერთად.

როცა ნამუშევრის კონცეფციაზე ვმუშაობდი, ხელახლა ჩავეძიე მითოლოგიურ ამბებს დღევანდელი სოციალური ცხოვრების მღელვარე კონტექსტში. საბოლოოდ, ესაა ის ფარული დინება, რომელიც კვებავს ნაწარმოებს. „შიგნიდან“ გამოსვლა, ემოციებში „გაკვანძული“ და მათგანვე „გახსნილი“. ამ პროცესში ჩემთვის უდიდესი შთაგონების წყარო იყო სიდჰას სკულპტურის სიცარიელე და მარადიული სივრცე".

ფოტო: გვანცა ნემსაძე / On.ge

ფოტო: გვანცა ნემსაძე / On.ge

ფოტო: გვანცა ნემსაძე / On.ge

თბილისის მე-8 საერთაშორისო თეატრალური ფესტივალი 24 სექტემბერიდან 8 ოქტომბრის ჩათვლით გაგრძელდება.

ფესტივალის საერთაშორისო პროგრამა 24 სექტემბერიდან 6 ოქტომბრამდე ხოლო, პროგრამა New - 27 სექტემბერიდან 1, 3 ოქტომბერამდე ჩატარდება. ქართული სპექტაკლების პროგრამა გასული სეზონის შეჯამება იქნება და 4-8 ოქტომბერის ჩათვლით გაიმართება.

ფესტივალის ორგანიზატორების განცხადებით, დაგეგმილია გამოფენების, ვორქშოფებისა და სემინარების მოწყობა.

თბილისის ქუჩებსა და სხვადასხვა თეატრში მაყურებელი ინდოეთის, პოლონეთის, უკრაინის, დიდი ბრიტანეთის, გერმანიის, რუსეთის, სომხეთის, იაპონიის თეატრების დადგმებს იხილავს.

თბილისის საერთაშორისო თეატრალური ფესტივალი სამთავრობო პროექტის Check in Georgia ფარგლებში ტარდება.

ფესტივალის პროგრამის სრულად ნახვა შეგიძლიათ აქ.