ატმოსფერული ჰაერის დაბინძურების შესახებ შექმნილმა თემატურმა ჯგუფმა მუშაობა უკვე დაასრულა და გარემოს დაცვის კომიტეტმაც შემუშავებული რეკომენდაციები გაასაჯაროვა.

დოკუმენტში, რომელიც პარლამენტის გვერდზე გამოქვეყნდა, სხვა ეკოლოგიურ საკითხებთან ერთად სუფთა ტრანსპორტის მნიშვნელობაზეა საუბარი. ამ ქვეთავში რამდენიმე ინიციატივაა განხილული, რომელიც სამუშაო ჯგუფის მუშაობის ფარგლებში მხარეებმა დააყენეს.

"თბილისის ძველ უბნებში (მაგალითად, სოლოლაკი), რომელიც გამოირჩევა ინტენსიური დასახლებით, კულტურული მემკვიდრეობის ძეგლებითა და საცობებით, თან, ტურისტულად მიმზიდველია, აიკრძალოს ყველანაირი ავტოსატრანსპორტო საშუალების გადაადგილება. გამონაკლისი შეიძლება იყოს ადგილობრივი მოსახლეობის ჰიბრიდული და ელექტროტრანსპორტი", — ნათქვამია ანგარიშში.

აქვე ვკითხულობთ ინიციატივას, რომლის მიხედვითაც, თბილისის მერიამ უნდა განიხილოს იმის შესაძლებლობა, რომ შოთა რუსთაველის გამზირი კვირაში ერთხელ (მაგალითად, კვირა დღეს) დაიკეტოს ავტოსატრანსპორტო საშუალებებისთვის და გაიხსნას მხოლოდ ქვეითთათვის.

ამავე თემაზე: მოსაკრებელი ოჯახში 2-ზე მეტ მანქანასა და ძრავის მოცულობაზე — გარემოს კომიტეტის ინიციატივები