ამბოხისა და ბრძოლისკენ მოწოდება - ამ შინაარსით გამოიცა ახალი წიგნი ევაკუაციის გეგმა. ლექსების კრებული პრემია საბას ლაურეატის, ეკა ქევანიშვილის, მეოთხე წიგნია.

პრეზენტაცია 14 სექტემბერს მკითხველისა და მეგობრების გარემოცვაში, კაფე ეზოში გაიმართა. წვიმიან საღამოს, თბილისურ ეზოში ისაუბრეს საზოგადოებაზე, პრობლემებზე, მოგვარების გზებზე, სიყვარულის აუცილებლობაზე, გამოხატვის თავისუფლებაზე, ნეპოტიზმზე, უსამართლობაზე და რაც მთავარია, პროტესტზე. ისაუბრეს ლექსებით, როგორც პოეტმა აღნიშნა, პროტესტის ერთ-ერთი ყველაზე ძლიერი იარაღით.

წიგნი დაბეჭდა გამომცემლობამ წიგნები ბათუმში. მათი განცხადებით, ეკა ქევანიშვლთან თანამშრომლობა გამომცელობისთვის მნიშვნელოვანი შენაძენია:

"მიუხედავად იმისა, რომ საზოგადოება და გამომცელების უმეტესობა სკეპტიკურად უდგება პოეზიის კრებულის გამოცემას, ჩვენ გადაწყვეტილება რამდენიმე წამში მივიღეთ. ეს რამდენიმე წამი კი ერთმანეთისთვის ემოციების გასაზიარებლად დაგვჭირდა, ყველას გაგვიხარდა ეკასთან თანამშრომლობის შანსი. ეს არ იყო არანაირი რისკი."

წიგნის ყდის დიზაინი ნატალია ავალიანს ეკუთვნის. ევაკუაციის გეგმა, მიუხედავად სახელისა და ვიზუალისა, არ გიამობთ გაქცევაზე, პირიქით, წიგნი მოგიწოდებთ დარჩეთ და იბრძოლოთ, სინამდვილეს თვალი გაუსწოროთ და გამოხატოთ პროტესტი.

"სინამდვილეში ეს წიგნი არ არის გაქცევის მცდელობაზე.

არც აფეთქების საშიშროება გელით, რომ სათადარიგო გასასვლელი გამოიყენოთ.

ეს წიგნი საერთოდ არ არის წასვლაზე. პირიქით.

ეს წიგნი უხერხულობის აღიარებაზეა.

ეს წიგნი დარჩენასა და სინამდვილისთვის დიდხანს თვალებში ყურებაზეა.

ცოდნა გამძიმებს, მაგრამ მიწაზე გამაგრებს.

თვალის გასწორება გტკენს, მაგრამ გამოსავალზე გაფიქრებს.

გღლის, მაგრამ როცა ყველაფერს ჰქვია თავისი სახელი, ყოველთვის გაქვს პასუხიც.

და გაქვს ევაკუაციის გეგმაც, იმ შემთხვევაში თუ დაგჭირდა."

ავტორმა გააერთიანა პირადი, მეგობრების, საზოგადოების და ქვეყნის პრობლემები. ხმამაღლა განაცხადა საკითხებზე, რომელზე დუმილიც დანაშაულად მიიჩნია.

"ეკა უნიკალური ადამიანია, იმიტომ არა, რომ კარგი მწერალი ან კარგი ჟურნალისტია, იმიტომ, რომ მან კარგად იცის ამბის მოყოლა და ორივე საქმიანობაში ეს არის მთავარი. თავისი ლექსებით ის გიყვება ამბავს ისე, როგორც ხედავს და უნდა დაგანახოს, მისთვის ეს პროტესტის გამოხატვაა, ჩემთვის კი ახალი ისტორია", - ასე შეაფასა პრეზენტაციაზე ეკა ქევანიშვილის შემოქმედება რუსუდან ვაშაყმაძემ.

ცოტაოდენი ღვინო და საუბრები წიგნზე, მთავარ სათქმელზე, მსოფლიოზე, ცვლილებების მოლოდინზე - პრეზენტაცია ამ რეჟიმში გაგრძელდა. სანამ ავტორი მკითხველების რიგის თავში იჯდა და ავტოგრაფებს არიგებდა, სხვები კითხულობდნენ, პარალელებს ავლებდნენ და კამათობდნენ ვინ მოიაზრება, ვის ეხება და რა მიზანი აქვს ავტორს. მიზანი კი ერთია, ბრძოლა :

"მე დავწერე ლექსები იმაზე, რაც დავინახე, რამაც შემაწუხა და რის მიმართაც პროტესტის გრძნობა გამიჩნდა. ეს კრებული ჩემი პროტესტია"

ფოტო: თამუნა გეგიძე On.ge