შერეული ორთაბრძოლების ყველაზე ცნობადმა წარმომადგენელმა, ირლანდიელმა კონორ მაკგრეგორმა Fifa.com-თან მანჩესტერ იუნაიტედზე, კრიშტიანო რონალდუსა და ზლატან იბრაჰიმოვიჩის შესახებ ისაუბრა.

ცნობილია, რომ კონორ მაკგრეგორი შერეულ ორთაბრძოლებამდე ფეხბურთელობაზე ოცნებობდა და სხვადასხვა აკადემიებშიც ირიცხებოდა. მიუხედავად იმისა, რომ ამ სპორტში წარმატებას ვერ მიაღწია, ირლანდიელმა UFC-ში შესანიშნავი კარიერა აიწყო და ყველაზე მაღალანაზღაურებადი მებრძოლიც გახდა.

"მე მანჩესტერ იუნაიტედის გულშემატკივარი ვარ... ბავშვობაში, როცა ამ გუნდის თამაშს ვუყურებდი, მიტაცებდა მათი გამარჯვებული მენტალიტეტი და ხალხი, რომელიც იმ დროს იუნაიტედში მუშაობდა, მათ შორის ირლანდიელი ლეგენდები როი კინი და დენის ირვინი. როი კინი ევროპაში ერთ-ერთი საუკეთესო ნახევარმცველი იყო, რომელიც მეტოქეებს თამაშის დაწყებამდეც კი შიშის ზარს სცემდა", - ამბობს კონორი.

MMA-ის ვარსკვლავმა ოლე გუნარ სულშერის მოღვაწეობაც შეაფასა. ის ფიქრობს, რომ მანჩესტერ იუნაიტედმა ნორვეგიელ მწვრთნელს ხანგრძლივი კონტრაქტი უნდა მისცეს.

კონორ მაკგრეგორი (მარჯვენა) მანჩესტერ იუნაიტედის ფორმით

კონორ მაკგრეგორი (მარჯვენა) მანჩესტერ იუნაიტედის ფორმით

"მან გუნდში ბევრი რამ შეცვალა. აშკარაა, რამხელა სიამაყესა და მონდომებას გრძნობს ეს კაცი ამ გუნდის მიმართ. მისი მოსვლის შემდეგ ფეხბურთელებმაც იგრძვნეს ის სიამაყე, რასაც წითელი ეშმაკების გერბის ტარება ნიშნავს", - ამბობს მაკგრეგორი.

Fifa.com-ის ჟურნალისტმა ირლანდიელს რონალდუს შესახებაც ჰკითხა, რომელიც კონორის მეგობარია.

"რონალდუ წარმოუდგენელი ათლეტი და ადამიანია. ის, რაც მან ატლეტიკო მადრიდის წინააღმდეგ გააკეთა, ნამდვილად შთამბეჭდავია", - დაამატა კონორმა.

ჟურნალისტმა კონორს იბრაჰიმოვიჩის შესახებაც ჰკითხა, ზლატანმა ერთხელ თქვა, კონორ მაკგრეგორი MMA-ის ზლატან იბრაჰიმოვიჩიაო და თქვენ რას იტყოდით მის შესახებო, რაზეც ირლანდიელმა მოქნილად უპასუხა:

"მე ვაფასებ ზლატანსა და მის გამარჯვებულის მენტალიტეტს, მაგრამ მოდით პირდაპირები ვიყოთ: მხოლოდ ერთი კონორი არსებობს! პირიქითაა — ზლატანი ცდილობს იყოს ფეხბურთის კონორ მაკგრეგორი და ამაში მას წარმატებას ვუსურვებ. ზლატანსა და პოლ პოგბას ნებისმიერ დროს შეუძლიათ მეწვიონ და ჩემთან ერთად ივარჯიშონ", - თქვა ორი წონითი კატეგორიის ყოფილმა ჩემპიონმა, კონორ მაკგრეგორმა.