Facebook-ის ადმინისტრაციამ რუსული სახელმწიფო ტელეკომპანიის Russia Today-ის კუთვნილი რამდენიმე პროექტის ანგარიში დაბლოკა. ამის შესახებ ინფორმაცია 18 თებერვალს RT-ის მთავარმა რედაქტორმა მარგარიტა სიმონიანმა გაავრცელა.

სიმონიანის თქმით, საუბარია პროექტზე სახელწოდებით "In The Now", რომელსაც 4 მილიონამდე გამომწერი ჰყავდა, ხოლო გვერდზე ატვირთულ ვიდეოებს, ჯამურად, 2,5 მილიარდი ნახვა ჰქონდა. პროექტის ხელმძღვანელი კი RT-ის ერთ-ერთი წამყვანი ჟურნალისტი ანისა ანუეი იყო.

Facebook-ის მიერ გავრცელებულ განცხადებაში ნათქვამია, რომ აღნიშნულ ანგარიშზე არ იყო განთავსებული ინფორმაცია, მათი დამფუძნებლებისა და დაფინანსების წყაროების შესახებ. გვერდების დაბლოკვის მიზეზიც სწორედ ეს გახდა. "მომხმარებლებმა უნდა იცოდნენ, ვინ დგას იმ გვერდებისა და ანგარიშების უკან, საიდანაც ისინი ინფორმაციას იღებენ", — ნათქვამია Facebook-ის განცხადებაში.

გასულ კვირას CNN-მა გაავრცელა ინფორმაცია, იმ ფეისბუკგვერდების შესახებ, რომლებიც რუსეთიდან ფინანსდებოდა. ტელეკომპანიის ცნობით, საუბარია სამ ფეისბუქ გვერდზე, რომელზეც ძირითადად, ამერიკელ ახალგაზრდა მილენიალებზე გათვლილი ვიდეოკონტენტი იდებოდა. ამ გვერდებზე ხშირად აკრიტიკებდნენ აშშ-ს საშინაო და საგარეო პოლიტიკას. პარალელურად, ეს გვერდები ამერიკულ მასობრივ მედიას დეზინფორმაციასა და ფაქტების დამახინჯებაში ადანაშაულებდნენ.

აღნიშნული ფეისბუკგვერდები თემატურად განსხვავებულ პროდუქტს აწარმოებდნენ, გვერდი Soapbox მიმდინარე მოვლენების გაშუქებისთვის, Waste-ed, ეკოლოგიის თემაზე, ხოლო BackThen კი ისტორიული მოვლენების მიმართულებით მუშაობდა.

სამივე ფეისბუკგვერდის უკან კომპანია Maffick Media დგას, ხოლო თავად კომპანია Maffick კი კომპანია Ruptly-ის მფლობელობაშია. თავის მხრივ, კომპანია Ruptly კი, Russia Today-ის შვილობილი ორგანიზაციაა. ამ დროისთვის, დაბლოკილია RT-ისთან კავშირში მყოფი 4 ფეისბუკგვერდი.

17 იანვარს Facebook-მა რუსულ სახელისუფლებო მედია სპუტნიკთან კავშირში მყოფი 364 ყალბი ამბების გვერდი და ანგარიში გააუქმა.