არსებობის 30-წლიან ისტორიაში სიმპსონების შემქმნელებმა უამრავ ხუმრობასა თუ მემეს ჩაუყარეს საფუძველი, თუმცა მათ შორის არსებობს უდავო ფავორიტიც - გიფი, რომელშიც ჰომერი ბუჩქებში უჩინარდება.

ფოტო: Fox / Giphy

გაიხსენეთ, რამდენჯერ გამოგიყენებიათ ეს გიფი უხერხულ სიტუაციებში: როცა ჯგუფურ ჩატში მეგობრები ჩხუბობენ, როცა თანამშრომლის საჩუქრისთვის ფულის დადება არ გინდათ, როცა ინიციატივას გამოთქვამთ, რომელსაც არავინ ითვალისწინებს, როცა ქრაში ძლივს ნათქვამ გამარჯობაზე არაფერს გპასუხობთ და ასე შემდეგ...

როგორც ჩანს, ამ გიფის არსებობის შესახებ ჰომერმაც იცის.

ტვიტერზე სიმპსონების ოფიციალურმა გვერდმა გამოაქვეყნა ნაწყვეტი, რომელშიც ჰომერი ლიზას სწერს, რომ ტელეფონს ვერ პოულობს.

ლიზა მაშინვე ხვდება, რაშია საქმე და მამას პასუხობს: ამ წამს ტელეფონით მწერ.

და ჰომერი უხერხულობას საკუთარი გიფის გამოყენებით ფანტავს. იდეალური გადაწყვეტილება!

რა თქმა უნდა, სიმპსონების ფანებს ეს მომენტი არ გამოპარვიათ. მაგალითად, ერთმა მომხმარებელმა დაწერა: ღმერთო ჩემო, ცხოვრება ბაძავს ხელოვნებას, რომელიც ბაძავს ცხოვრებას.

ამ მონაკვეთთან დაკავშირებით გარკვეული თეორიებიც წამოიჭრა: ანუ ჰომერმა იცის, რომ მის ცხოვრებას აკვირდებიან? და ის თუ იცის, რომ როცა ამ გიფს იყენებს, მაშინაც იღებენ?!

ასე თუ ისე, ეს პატარა გონებამახვილური ხუმრობა იმას ამტკიცებს, რომ სიმპსონების შემქმნელები მუდამ უწყობენ თანამედროვეობას ფეხს და ხშირად იმაზე უკეთ, ვიდრე ჩვენ წარმოგვიდგენია.