Google Play ფასიანი აპლიკაციების მიღებას ქართველი დეველოპერებისგანაც დაიწყებს. ამის შესახებ AndoirdPolice იუწყება.

Google Play Store მობილური აპლიკაციების და თამაშების მაღაზიაა (Apple-ის App Store-ის მსგავსი), რომელიც Android-სისტემაში გამოიყენება.

ამ დრომდე, Google Play-ში ქართულ კომპანიებს და ფიზიკურ პირებს მხოლოდ უფასო აპლიკაციების განთავსება შეეძლოთ. ამიერიდან, მათ შეუძლიათ მომხმარებლებს ფასიანი აპლიკაციები, ან - უფასო აპლიკაციებში ჩადებული ფასიანი ფუნქციები და კონტენტი შესთავაზონ (ე.წ. in-app purchases).

უახლოეს მომავალში, Google Play-ში ქართული საბანკო ბარათებითაც გახდება შესაძლებელი ფასიანი აპლიკაციების შეძენა. ეს ლოგიკური ნაბიჯია, ქართველი დეველოპერებისთვის ამ ბაზრის გახსნის პარალელურად. ჯერჯერობით უცნობია, შეეხება თუ არა ეს ცვლილება Google-ის სხვა პროდუქტებს, სადაც, ქართული ბარათებით შესყიდვა დღემდე პრობლემურია (Google Drive, GSuite, ა.შ.)

ტექნიკური დოკუმენტების მიხედვით, დეველოპერმა საკუთარი აპლიკაციის (ან in-app purchase-ის) ფასი წინასწარ განსაზღვრული საფასო კატეგორიებიდან უნდა აარჩიონ. მინიმალური ფასის კატეგორია 2 ლარია, რაც ნიშნავს, რომ ყველაზე იაფი, რაც შეიძლება აპლიკაცია ღირდეს, 2 ლარია. ორი ლარი იქნება იმ უცხოური აპლიკაციების ფასიც, რომელიც, მაგალითად, Google Play-ის აშშ-ს ვერსიაში 99 ცენტად იყიდება.

Play Store-ის ბაზრის გახსნა, მნიშვნელოვანი მოვლენაა როგორც მობილური აპლიკაციების და თამაშების მწარმოებელი ქართული კომპანიებისთვის, ისევე - ანდროიდის მომხმარებლებისთვისაც. კომპანიებს და ინდივიდუალურ დეველოპერებს Play Store აძლევს წვდომას Android-აპლიკაციების ყველაზე დიდ ბაზართან მსოფლიოში, სადაც, მათი პროდუქტების შეძენა, ქართველ მომხმარებლებსაც შეეძლებათ. მომხმარებლებისთვის კი, ეს ნიშნავს უფრო მეტ აპლიკაციას, თამაშს და სერვისს, რომელიც ქართული ბაზრისთვის იქნება შექმნილი.

მიმდინარე მომენტისთვის, Play Store-ის მსგავსი მაღაზია Apple-ის მოწყობილობების მომხმარებლებისთვის (App Store), საქართველოში მიუწვდომელია. მიუხედავად იმისა, რომ საქართველოში უკვე არიან Apple-ის ოფიციალური რესელერები, როგორც ჩანს, კომპანია ამ ბაზრის საქართველოსთვის გახსნას ჯერ არ ჩქარობს.