ადამიანთა ერთი ნაწილისთვის ორშაბათი იმ ინფორმაციით დაიწყო, რომ მთავრობა მათ სესხებს მათ ნაცვლად დაფარავს.

ჩვენ, ვისაც ან არ დაგვიგროვებია 2 000 ლარამდე დავალიანება, ან უბრალოდ, უფრო დიდი წარმოსახვის უნარით გამოვირჩევით, კიდევ 10 სურვილი გვაქვს, რომელთა ასრულებაც მეორე ტურამდე ძალიან გაგვახარებდა.

1. სანამ ჩვენ სამსახურში ვიქნებით, სახლი დაგვილაგოს

რა ჯობია იმას, როცა სამსახურიდან შინ დაბრუნებულს ყველაფერი მილაგებული და მოწესრიგებული გხვდება და საღამოს ისე ატარებ, როგორც გრძელი, შრომატევადი დღის შემდეგ იმსახურებ.

2. საახალწლოდ ნაძვის ხე აგვიწყოს

ვიცით, რომ არსებობენ ადამიანები, რომელთაც წინასაახალწლო ფუსფუსი და სახლში ნაძვის ხის აწყობა დიდ სიამოვნებას ანიჭებს, მაგრამ წარმოიდგინეთ, რომ ამ ყველაფერს ვიღაც თქვენ ნაცვლად აკეთებს და დილით გაღვიძებულს სახლი საახალწლოდ მორთული გხვდებათ! ალბათ მთავრობას და თანაინვესტირების ფონდს ამის გაკეთება არ გაუჭირდება.

3. სამსახურში ჩვენ ნაცვლად დარეკოს და უფროსს ჩახლეჩილი ხმით უთხრას, რომ "გაციებულია და ვერ მივა"

თქვენც გიგრძვნიათ სევდა, როცა დალაგებული და საახალწლოდ მორთული სახლი დილით ადრე დაგიტოვებიათ და სამსახურში წასულხართ? ჩვენც ვიცით, ეს რა გრძნობაა. თუმცა, თუ მთავრობა უფროსს ტყუილს ჩვენ ნაცვლად ეტყვის და პასუხისმგებლობებისგან ერთი დღით მაინც გაგვათავისუფლებს, შევძლებთ სამსახურიდან გათავისუფლების შიშის გარეშე ტელევიზორის წინ მოვკალათდეთ, პლედი მოვიხუროთ, სასუსნავები შემოვილაგოთ და საყვარელი საახალწლო ფილმი ჩავრთოთ.

4. ნათესავებს დაურეკოს და შვილის გაჩენა მიულოცოს

სწორედ მაშინ გვახსენდება, რომ რაღაც დაგვავიწყდა, როცა ყველაფერი ისე იდეალურადაა, როგორც წინა პუნქტშია აღწერილი. მაგალითად, დედის მეგობრის შვილის დაბადების დღე, ან ის რომ, ნათესავის ცოლმა გუშინ ბავშვი გააჩინა. კარგი იქნება, თუ წინასაარჩევნოდ მთავრობა ჩვენ მაგივრად დარეკავს ნათესავთან ორიგინალური სურვილებით და მთელ ოჯახს მოიკითხავს.

5. პირადი ურთიერთობები დაგვილაგოს

ჭამ და არ სუქდები, ნათესავები კმაყოფილები არიან, სახლი — დალაგებული, ნაძვის ხე — მორთული. რა დარჩა? ა, ხო, გვინდა, რომ ახალი წელი იმ ადამიანთან ერთად გავატაროთ, რომელიც ძალიან მოგვწონს და ამას ვერაფრით ვაგებინებთ. თუ მთავრობა ჩვენ მაგივრად გადადგამს ამ ურთულეს ნაბიჯს და ნელ-ნელა დააახლოებს ჩვენს ტრაექტორიას, კარგი იქნება. შეგვიძლია, მინიშნებაც მივცეთ: სტატუსების დალაიქებით დაიწყოს და დროდადრო მახვილგონივრული კომენტარები დაუტოვოს ხოლმე ფოტოებზე.

6. გაზის ინკასატორებს ჩვენ ნაცვლად უგზავნოს მრიცხველის ჩვენებები

თუ მთავრობა ვერ მოახერხებს, სახლში დახვდეს ხოლმე გაზის ქალებსა და კაცებს, მაშინ ჩვენ ნაცვლად უპასუხოს წერილზე "ვიყავი გაზზე, გთხოვთ დამიკავშირდეთ".

7. ყოველ დილით ჩვენ ნაცვლად გადაწყვიტოს "რა ჩავიცვათ"

მანამ, სანამ წინა პუნქტს შეგვისრულებს, დილით ურთულესი გადაწყვეტილება საკუთარ თავზე აიღოს და გემოვნებიანად შეგვიხამოს ტანსაცმელი. თუ დილით ადრე ადგომა მთავრობასაც გაუჭირდება, ამის გაკეთება ღამითაც შეუძლია.

8. როცა სახლში არ ვიქნებით, ჩვენს ცხოველებს მოუაროს

კატას, რომელიც მთელი დღე სახლში მარტოა, ან ოჯახის წევრები მისადმი დიდ ყურადღებას არ იჩენენ, გაართოს, ეთამაშოს, მოეფეროს, აჭამოს და ტუალეტისთვის გამიზნული ადგილი გაუსუფთაოს. ცუგა კი სასეირნოდ წაიყვანოს და იზრუნოს იმაზე, რომ ქალაქის ქუჩების სისუფთავეს ძაღლის "გასეირნების შემდეგ" საფრთხე არ შეექმნას.

9. ევროპის რომელიმე ქვეყანაში მოგზაურობა მთლიანად დაგვიგეგმოს

ახალი წლების შემდეგ ერთი კვირით დასვენების გახანგრძლივებას რა ჯობს? ან, 2 იანვარს მოგზაურობაზე უკეთესი რა უნდა დავიბედოთ? თუმცა, მოგზაურობამდე უამრავი რამაა დასაგეგმი და გასათვალისწინებელი: წინასწარ ადგილებია მოსაძიებელი, რომლის ნახვაც გვინდა, შედარებით იაფიანი და სუფთა დასარჩენი ადგილია საპოვნელი, ბარგი ჩასალაგებელი და ასაწონი. რადგან მთავრობაში უამრავი ადამიანია, ვისაც ამის გაკეთება შეუძლია, წინასაარჩევნო ოცნებებს ესეც შეიძლება შევმატოთ.

10. ჩვენ ვჭამოთ და მთავრობა გასუქდეს

წარმოიდგინეთ, რომ რასაც გინდათ იმას ჭამთ, რამდენსაც გინდათ იმდენს და არ სუქდებით. არაოფიციალური ინფორმაციით, ასეთი სწრაფი მეტაბოლიზმით 100-დან ერთი ადამიანი იბადება, თუმცა, თუ დანარჩენ 99 ადამიანზე მთავრობა წინასაარჩევნოდ იზრუნებს, სიტუაცია საგრძნობლად შეიცვლება.

[ბონუსი] ჩვენ ნაცვლად ინერვიულოს

თუ ჩვენს ქრაშთან მოლაპარაკებისას რაღაც კარგად არ გამოუვა, თავადვე ინერვიულოს და დეპრესიული პერიოდი ჩვენ ნაცვლად გაიაროს. რადგან სანერვიულო არ გველევა, ყველაფერი თავის თავზე აიღოს, რომ წინასაარჩევნოდ გადაწყვეტილება მშვიდ გონებაზე მივიღოთ.