სავარაუდოდ ქსენოფობიურ ნიადაგზე მოკლულ უფლებადამცველ ვიტალი საფაროვს 2018 წლის ტოლერანტობის ქომაგის ჯილდო მიანიჭეს და ჯილდო ვიტალის დედას გადასცეს.

2018 წლის 16 ნოემბერს საქართველოს სახალხო დამცველთან არსებული ტოლერანტობის ცენტრმა ტოლერანტობის საერთაშორისო დღისადმი მიძღვნილი ღონისძიება გამართა, რომელზეც ეროვნულ უმცირესობათა და რელიგიათა საბჭოების მიერ გამოვლენილი ტოლერანტობის ქომაგები დააჯილდოეს.

უფლებადამცველი ვიტალი საფაროვი 2018 წლის 30 სექტემბერს მოკლეს. არასამთავრობო ორგანიზაციები თავიდანვე აცხადებდნენ, რომ ვიტალი საფაროვის მკვლელობის საფუძველი ქსენოფობიური მოტივი იყო. ადამიანის უფლებათა ცენტრისა და ჩართულობისა და განვითარების ცენტრში კი ამბობდნენ, რომ საფაროვის მკვლელობაში ბრალდებულები ე.წ. ნეონაცისტური დაჯგუფების წევრები არიან.

პროკურატურის ინფორმაციით, ვიტალი საფაროვის მკვლელობის საქმეზე დამატებითი მტკიცებულებების საფუძველზე ბრალდებულს ბრალი დაუმძიმდა. უწყებაში ამბობენ, რომ საქმე რასობრივი, რელიგიური, ეროვნული ან ეთნიკური შეუწყნარებლობის გამო განზრახ მკველობის ჩადენის მუხლით გადაკვალიფიცირდა.

ჩადენილი დანაშაული 13 დან 17 წლამდე თავისუფლების აღკვეთას ითვალისწინებს. თავდაპირველად გამოძიება განზრახ მკვლელობისა და დანაშაულის შეუტყობილებლობის, სისხლის სამართლის კოდექსის108-ე და 376-ე მუხლებით მიმდინარეობდა.