ჩვენ შევკრიბეთ ის მთავარი სამეცნიერო სიახლეები, რომლებიც შეიძლება დატვირთული კვირის განმავლობაში გამოგრჩენოდათ.

1. კვლევა: მეხსიერების წყარო შესაძლოა უძველესი ვირუსი იყოს

დადგინდა, რომ ტვინში არსებული ერთ-ერთი ცილა, რომელიც მეხსიერების ფუნქციონირებისთვის აუცილებელია, თავისი ქცევით ვირუსს ძალიან წააგავს. მეცნიერები ფიქრობენ, რომ ცილის წარმომავლობა 350-400 მილიონი წლის წინ არსებულ ვირუსს უკავშირდება.

გაიგეთ მეტი: http://go.on.ge/w4m

2. კილოგრამი ცვლილებას განიცდის, თუმცა ეს იმას არ ნიშნავს, რომ სასწორზე სხვა რიცხვი დაიწერება

მეცნიერებმა გადაწყვიტეს, რომ პარიზის მიწისქვეშა საცავში დაცული მეტალის ცილინდრი კილოგრამის ეტალონად აღარ გამოდგება. წონის ერთეული ახალი განსაზღვრება პლანკის მუდმივაზე იქნება დაფუძნებული.

გაიგეთ მეტი: http://go.on.ge/w7m

3. მთის გორილას გადაშენების კრიტიკული საფრთხე აღარ ემუქრება

კონსერვაციული ქმედებების შედეგად ბუნებაში მთის გორილების რაოდენობა 1 000-ს აცდა. ბუნების დაცვის საერთაშორისო კავშირის თქმით, მთის გორილას გადაშენების საფრთხე მაინც არსებობს, თუმცა ამ ეტაპზე მდგომარეობა კრიტიკული აღარ არის.

წყარო: iflscience

4. ჩვენი მზის სისტემა ბნელი მატერიის "ქარიშხალში" მოხვდა

მეცნიერებმა დაადგინეს, რომ ჩვენი მზის სისტემა ბნელი მატერიის ნაკადში მოხვდა, რომელიც წამში 500 კილომეტრის სიჩქარით მოძრაობს. ნაკადს ბნელ მატერიასთან ერთად 30 000 ვარსკვლავიც მოყვება, თუმცა, საბედნიეროდ, დედამიწას არც ერთი მათგანი არ შეეჯახება.

გაიგეთ მეტი: http://go.on.ge/w5l

5. გრენლანდიაში მყინვარის ქვეშ 30-კილომეტრიანი კრატერი აღმოაჩინეს

გრენლანდიაში მეცნიერებმა ყინულის ქვეშ სპეციალური რადარით 300 მეტრის სიღრმის მქონე მრგვალი სტრუქტურა დააფიქსირეს - ადგილიდან აღებულ ნიმუშებში დაფიქსირდა მეტეორის შეჯახების ფიზიკური კვალიც. მეტეორის სიგანე სავარაუდოდ ერთი კილომეტრი იყო.

გაიგეთ მეტი: http://go.on.ge/w9e

6. კვლევა: ორანგუტანი ერთადერთი ცხოველია, რომელსაც წარსულზე საუბარი შეუძლია

აქამდე ითვლებოდა, რომ დროის ამგვარი აღქმა მხოლოდ ადამიანებს შეეძლოთ. ექსპერიმენტის ფარგლებში მეცნიერები დააკვირდნენ, მტაცებელის გამოჩენიდან რამდენ ხანში ავრცელებდნენ ორანგუტანები განგაშის სიგნალს. ამაზე დაყრდნობით მეცნიერები ვარაუდობენ, რომ ორანგუტანებს წარსულზე ფიქრი შეუძლიათ.

წყარო: ScienceAlert

7. ჭარბწონიანობასა და დეპრესიას შორის გენეტიკური კავშირი გამოაშკარავდა

73 კონკრეტული გენოტიპის გაანალიზების შემდეგ, ასაკისა და სქესის გათვალისწინებით, მეცნიერებმა დაადგინეს, რომ სხეულის მასის ინდექსის ყოველი 4.7-ით მომატებისას კაცებში დეპრესიის განვითარების რისკი 18-ით, ხოლო ქალებში კი 23 პროცენტით იზრდება.

გაიგეთ მეტი: http://go.on.ge/w5p

8. ბირთვული სინთეზის რეაქტორში ტემპერატურის ახალი რეკორდი მოიხსნა - 100 მილიონი ცელსიუსი

სატესტო გაშვების დროს მეცნიერებმა რეაქტორში მზის ცენტრში არსებულ ტემპერატურაზე 6-ჯერ უფრო ცხელი პლაზმა შექმნეს. თუ მეცნიერები პლაზმის შენარჩუნებას დიდი ხნის განმავლობაში შეძლებენ, ეს შეიძლება სუფთა ენერგიის წყარო გახდეს.

წყარო: Futurism

9. უდაბნოში წვიმის მოსვლამ იქ არსებული სიცოცხლე გაანადგურა

ატაკამის უდაბნო, სადაც ბოლო 500 წელია მნიშვნელოვანი ნალექი არ დაფიქსირებულა, ბოლო 15 მილიონი წლის განმავლობაში ჰიპერ-მშრალ მდგომარეობაში იმყოფება. 2015 წელს ატაკამაში რამდენჯერმე გაწვიმდა, რამაც იქ არსებული მიკრობების უმეტესი ნაწილი გაანადგურა.

წყარო: iflscience

10. დღის რომელ მონაკვეთში ვწვავთ ყველაზე მეტ კალორიას? - კვლევის შედეგები

კვლევის ფარგლებში დადგინდა, რომ ადამიანები შუადღით მოსვენების მდგომარეობაში ყოფნისას 10%-ით უფრო მეტ კალორიას წვავენ, ვიდრე იმავე მდგომარეობაში საღამოს, ან გვიან ღამით ყოფნისას.

გაიგეთ მეტი: http://go.on.ge/w9l