პრეზიდენტ ტრამპის ნომინანტს უზენაესი სასამართლოს მოსამართლის პოსტზე, ბრეტ კავანას სექსუალურ შევიწროებაში ორი ქალი ადანაშაულებს, თუმცა ის აცხადებს, რომ უმაღლესი სასამართლოს წევრობაზე უარის თქმას არ აპირებს. ამ საკითხის აქტუალურობამ Girls-ის მსახიობს, ჯემაიმა კირკეს უბიძგა, თავისი ცხოვრებიდან მტკივნეული ეპიზოდი გაეხსენებინა:

"მე მჯერა ქრისტინ ბლეისი ფორდის. 22 წლის ვიყავი, როცა ჩემმა დილერმა გამაუპატიურა, რის შემდეგაც თავაზიანად ვთხოვე, წასულიყო (არ მინდოდა, გამებრაზებინა) და ჩემი ფეხით მივედი საავადმყოფოში. გადამდებ დაავადებებზე ჩატარებული ტესტების შემდეგ, ექიმმა თანაგრძნობით მითხრა, შენს თავზე უნდა იფიქროო. ჩემი აზრით ამ სიტყვებში იგულისხმებოდა: "ეს ყველაფერი არ მოხდებოდა, დილერებთან შეხება რომ არ გქონოდა". ისე გამოვიდა, თითქოს პასუხისმგებლობა მე მეკისრებოდა. ეს იყო მიზეზი, რის გამოც ეს ისტორია არავისთვის მომიყოლია და არც პოლიციას დავკავშირებივარ", - თქვა 33 წლის მსახიობმა.

ჯემაიმამ ისიც დაამატა, რომ საშინლად რცხვენოდა, რაც სრულიად უსაფუძვლო იყო, რადგან "დილერები იმაზე ხშირად არ აუპატიურებენ გოგოებს, ვიდრე ოჯახის ახლობლები".

"სამწუხაროდ, ჩემი ამ წარმოდგენის შეცვლა არც სარეაბილიტაციო ცენტრში უცდიათ. მათ მითხრეს, რომ გაუპატიურება იმის ნიშნად უნდა მიმეღო, რომ ჩემი ცხოვრება ცვლილებას საჭიროებდა. ამავე აზრზე იყო დედაჩემიც. შეიძლება, ჩემი შვილიც გახდეს ოდესმე სექსუალური ძალადობის მსხვერპლი და სამწუხაროდ, მე ვერაფერს ვიზამ, მაგრამ დავარწმუნებ, რომ არასდროს, არც ერთ გარემოებაში ეს მისი ბრალი არ იქნება", - ნათქვამია ტვიტში.