განათლების ხარისხის ეროვნული ცენტრის განცხადებით, იმ სტუდენტებისთვის, რომლებისთვისაც შავი ზღვის საერთაშორისო უნივერსიტეტი პრიორიტეტი იყო, სტუდენტთა ელექტრონულ ფორმატზე მობილობისთვის სპეციალური რეგისტრაციის გავლა მოუწევს.

ცენტრის ცნობით, 2018-2019 სასწავლო წლის შემოდგომის სემესტრისათვის მობილობის მსურველ სტუდენტთა ელექტრონულ პორტალზე რეგისტრაციის დამატებით ვადად განისაზღვრა - 2018 წლის 22 აგვისტოდან 27 აგვისტოს 18:00 საათამდე.

"მობილობის მსურველ/მონაწილე ყველა სტუდენტს შეუძლია დარეგისტრირდეს ან შეცვალოს არჩევანი მიმდინარე წლის 22 აგვისტოდან 27 აგვისტოს 18 საათამდე. მობილობაში მონაწილე იმ სტუდენტებს, რომლებსაც ერთ-ერთ პრიორიტეტად არჩეული აქვთ შპს შავი ზღვის საერთაშორისო უნივერსიტეტი უნდა შეცვალონ არჩევანი არაუგვიანეს 2018 წლის 27 აგვისტოს 18 საათისა", - ნათქვამია განათლების ხარისხის განვითარების ეროვნული ცენტრის განცხადებაში.

შავი ზღვის საერთაშორისო უნივერსიტეტს სტუდენტების მიღების უფლება ერთი წლის ვადით შეეზღუდა. უმაღლესი საგანმანათლებლო დაწესებულებების ავტორიზაციის საბჭოს მიერ 2018 წლის 20 აგვისტოს მიღებული გადაწყვეტილებით, მიუხედავად იმისა, რომ სასწავლებელს ავტორიზაცია 6 წლით გაუგრძელდა, ისინი წელს სტუდენტებს ვერ მიიღებენ.

IBSU-ში მიაჩნიათ, რომ საბჭოს გადაწყვეტილება არაა ადეკვატური და მას უსაფუძვლოს და უსამართლოს უწოდებენ და საზოგადოებას მხარდაჭერას სთხოვენ.