ავა ბლაზერი მოცეკვავეა და ამავდროულად, სიმსივნეს ებრძვის. 10 წლის გოგო ქიმიოთერაპიის კურსებს გადის, თუმცა დაავადება მას ხელს არ უშლის თავის საყვარელი საქმიანობით დაკავდეს. მან ცოტა ხნის წინ, ეროვნულ კონკურსებშიც გაიმარჯვა.

როგორც ის CBS-სთან ინტერვიუში ამბობს, ცეკვა მოტივაციასა და მომავლის რწმენას აძლევს. კითხვაზე, თუ როგორ ახერხებს ქიმიოთერაპიების შემდეგ ცეკვის გაკვეთილებზე წასვლას, ის იღიმის და ამბობს:

"უბრალოდ, თავს ძალას ვატან".

ავა მხოლოდ 3 წლის იყო, როდესაც თირკმლებზე სიმსივნის დიაგნოზი დაუსვეს. 12-კვირიანი ქიმიოთერაპიის შემდეგ, მას ოპერაცია ჩაუტარეს და მარცხენა და მარჯვენა თირკმლის ნაწილი ამოკვეთეს. 4 წლის ასაკში, ექიმებმა ავას მშობლებს უთხრეს, რომ მათი შვილი სიმსივნისგან თავისუფალი იყო.

რამდენიმე თვის წინ, ექიმებმა შემოწმებისას აღმოაჩინეს, რომ ავას სხეულში სიმსივნე დაბრუნებულიყო. იანვრის შემდეგ, მან ორი ოპერაცია ჩაიტარა და კვლავ ქიმიოთერაპიებს გადის.

"ის ურთულეს პროცედურებს გადის. ქიმიოთერაპიების შემდეგ, ადამიანების უმრავლესობა ძალაგამოცლილია და მოძრაობა უჭირს. უბრალოდ დაუჯერებელია, რომ ის საავადმყოფოდან გასვლისთანავე ცეკვის გაკვეთილებზე მიდის", - ამბობს ავას ექიმი.

მუცლის ღრუში ჩატარებული ოპერაციებიდან ორ კვირაში და ქიმიოთერაპიის უწყვეტი კურსიდან 10 დღეში, ის კონკურსებზე გავიდა. ავა დასთან ერთად ცეკვავს, თუმცა სოლო ნომრებიც აქვს. მან ორ კონკურსში გაიმარჯვა.

ავამ თავის ნომერს "თამაში გადარჩენისთვის" დაარქვა. ის ცეკვის დასრულებისას ბაფთას იხსნის, რომელიც სიმსივნის სიმბოლოა და ამით დაავადებისგან თავისუფლდება.