შინაგან საქმეთა სამინისტროს ინფორმაციით, ბათუმში ერთ-ერთი კლუბი უცხოელ სტუმრებს არარსებულ მენიუში ფულს იძულებით ახდევინებდა. ამ საქმეზე ფულის ჯგუფურად გამოძალვის ბრალდებით კლუბის მფლობელი და მისი თანამშრომელი დააკავეს.

"ბრალდებულებმა თურქეთის რესპუბლიკის მოქალაქე ა.ი. ნების საწინააღმდეგოდ ავტომობილში ჩასვეს და ბანკომატიდან 2 500 ლარის გამოტანა აიძულეს. მასთან ერთად კლუბში მყოფ, ასევე თურქეთის რესპუბლიკის მოქალაქე ა.დ.-ს კი 1 000 ლარი იძულებით გადაახდევინეს", - აღნიშნავენ შსს-ში.

საქმეზე გამოძიება სისხლის სამართლის კოდექსის 150-ე მუხლის მეორე ნაწილით მიმდინარეობს. ამ მუხლით ჯგუფურად ადამიანის ფიზიკური ან ფსიქიკური იძულება ისჯება გამასწორებელი სამუშაოთი ვადით ორ წლამდე ან თავისუფლების აღკვეთით ვადით თვრამეტ თვემდე, იარაღთან დაკავშირებული უფლებების შეზღუდვით ან უამისოდ.