მამაკაცი მიმზიდველად შეიძლება ჩაითვალოს ქერა და ხვეული თმის ან ლამაზი პიჯაკის გამო. თუმცა, თუ ჩაცმულობასა და ვარცხნილობას არ გავითვალისწინებთ და ახალ კვლევას დავუჯერებთ, არსებობს ერთი განსაკუთრებული მახასიათებელი - მამაკაცის მიმზიდველობა დამოკიდებულია იმაზე, თუ რამდენად პროპორციული მისი სხეული, განსაკუთრებით კი მისი ფეხები.

ქალები უპირატესობას ანიჭებენ მამაკაცებს, რომელთა ფეხების სიგრძეც მთლიანი სხეულის დაახლოებით ნახევარს შეადგენს. წინა კვლევების მიხედვით, ეს ქალის მიერ ჯანმრთელი მამაკაცის არჩევის სურვილის ევოლუციური შედეგია. მაგალითად, ძალიან მოკლე ფეხები შეიძლება მეორე ტიპის დიაბეტთან იყოს დაკავშირებული. ამის მსგავსად, სხვა პროპორციებიც - ხელის სიგრძე სხეულის სიგრძესთან შეფარდებით, ან რამდენად ზუსტად ჰყოფს იდაყვი ან მუხლი კიდურს - შეიძლება ბევრს ამბობდეს ადამიანის ჯანმრთელობაზე.

აქვს თუ არა ამ მახასიათებლებს გავლენა ქალის არჩევანზე? ამ კითხვაზე პასუხის გასაცემად, მკვლევარებმა შეაგროვეს აშშ-ს სამხედრო სამსახურში მყოფ 9000-მდე მამაკაცის სხეულის პროპორციები და ამ შედეგებით შექმნეს მამაკაცის სხეულის კომპიუტერულად გენერირებული მოდელი (მთავარი ფოტო). მეცნიერებმა განსხვავებული მოდელების მკლავებისა და ფეხების სიგრძეები ოდნავ გაზარდეს და შეამოკლეს. შემდეგ კი 800 ჰეტეროსექსუალ ამერიკელ ქალბატონს თითოეული მოდელი შეაფასებინეს.

მკვლევართა ჯგუფს თუ დავუჯერებთ, მამაკაცის ხელების სიგრძისა და მისი სიმაღლის შეფარდებას დიდი გავლენა არ ჰქონია შედეგებზე. არც იმას, თუ რამდენად პროპორციულ ნაწილებად ჰყოფენ მუხლი და იდაყვი მამაკაცის კიდურს. თუმცა, ქალბატონები ყურადღებას აქცევდნენ ისეთ შემთხვევებს, სადაც მოდელის ფეხის სიგრძე მოდელის სიმაღლის ნახევართან შედარებით მოკლე იყო და მათ ეს არ მოსწონდათ.

კვლევა ორიენტირებული იყო აშშ-ს მოსახლეობაზე და არ ითვალისწინებდა ჰომოსექსუალი მამაკაცების გემოვნებას. ამ მხრივ კვლევა ზუსტ ინფორმაციას ვერ მოგვცემს იმის შესახებ, თუ რამდენად მიმზიდველია მამაკაცი განსხვავებული ეროვნების ქალებისა თუ ჰომოსექსუალი მამაკაცებისათვის, თუმცა, კვლევის შედეგების გათვალისწინებით შეგვიძლია ვთქვათ, რომ ადამიანის მიმზიდველობაზე პროპორციები ნამდვილად ახდენს გავლენას.