მუსიკალური ფესტივალები თანამედროვე ახალგაზრდების ერთ-ერთი ყველაზე საყვარელი გასართობია, რომელსაც მთელი წლის განმავლობაში ელოდებიან ხოლმე. როგორც წესი, ფესტივალები რამდენიმე დღის განმავლობაში ტარდება, რაც იმას ნიშნავს, რომ ამ პერიოდში სტუმრები ადგილიდან ფეხს არ იცვლიან. შესაბამისად, მათ შესაძლოა დასჭირდეთ სამედიცინო ან სხვა ტიპის დახმარება, რომელიც საფესტივალი ტერიტორიაზეა უზრუნველყოფილი.

მსოფლიოს ყველა წამყვან ფესტივალზე მობილიზებულია სპეციალური ბრიგადა, რომელიც სტუმრების უსაფრთხოებასა და ჯანმრთელობაზე ზრუნავს. მაგალითისთვის, ერთ-ერთი ყველაზე მასშტაბური ფესტივალი Coachella თავის სტუმრებზე მაქსიმალურად ზრუნავს. ფესტივალის ორგანიზატორები აქტიურად თანამშრომლობენ ორგანიზაცია EmCare-თან, რომლებიც რეივერებს სხვადასხვა ტიპის დახმარებებს უწევენ.

ცხადია, ფესტივალებზე ადამიანები ხშირად არაფხიზელ მდგომარეობაში არიან, რაც მათი ინტოქსიკაციისა და სხვა ტიპის საფრთხეებს ზრდის. EmCare რეივერების, ანუ ფესტივალზე გასართობად მისული ადამიანების დასახმარებლად არაერთ ღონისძიებას ატარებს. პირველ რიგში უნდა ითქვას, რომ ფესტივალის ტერიტორიაზე სპეციალური კარვებია მობილიზებული, სადაც მედიკოსები თავიანთ მოვალეობას ასრულებენ. სხვადასხვა სიმპტომებით, ნებისმიერ რეივერს შეუძლია მიმართოს მათ დახმარების თხოვნით და მედიკოსები ყველაფერს გააკეთებენ, რომ მათი ჯამრთელობა გაუმჯობესდეს.

EmCare-ის ერთ-ერთი ექიმი ყვება, რომ ფესტივალზე ხშირად უწევს შეხება ალკოჰოლით მოწამლულ ადამიანებთან. ასევე მათთან, ვინც ნარკოტიკული საშუალებების მიღების გამო თავი ცუდად იგრძნო. მისი თქმით, დიდია იმ ადამიანების რაოდენობაც, ვინც ღია ცის ქვეშ ყოფნის გამო ვირუსდება. EmCare-ის ექიმები, სიმპტომების მიხედვით, რეივერებს გადასხმებს უკეთებენ, აძლევენ შესაბამის მედიკამენტებს და დასვენების საშუალებას აძლევენ.

იმისთვის, რომ რეივერებს არ გაუჭირდეთ მედიკოსების პოვნა, EmCare-ის ექიმები მონაცვლეობით და ორგანიზებულად მოძრაობენ ფესტივალის ტერიტორიაზე, რათა დარწმუნდნენ, რომ ადამიანების სიცოცხლეს საფრთხე არ ემუქრება.

მსგავსი სიტუაციაა მსოფლიოს სხვადასხვა წამყვან ფესტივალებზე, როგორიცაა ამსტერდამის Open Air, Lollapalooza Paris, Tomorrowland და სხვ. ასეთი ღონისძიებების გატარება აუცილებელია იმისთვის, რომ ფესტივალზე მყოფი ადამიანების სიცოცხლე ფატალურად არ დასრულდეს.

ზოგიერთ მუსიკალურ ფესტივალზე მიღებული პრაქტიკაა ასევე კარვების გაშლა, სადაც სტუმრებს საკუთარი ნარკოტიკის მიტანა და იმაში დარწმუნება შეუძლიათ, რომ მასში მავნე მინარევები არაა. მათ ასევე ეხმარებიან დოზების დადგენაში.

მსგავსი პრაქტიკა ინერგება საქართველოშიც. ერთ-ერთი ყველაზე ცნობილი და წარმატებული ქართული ფესტივალი 4GB, რომელიც 18 მაისს იწყება, "რეივერებზე ზრუნვის" კამპანიას იწყებს. ამის შესახებ ფესტივალის ოფიციალური ფეისბუქ გვერდი იტყობინება. 4GB-ის ორგანიზატორების თქმით, ფესტივალის ტერიტორიაზე მობილიზებული იქნება რამდენიმე სასწრაფო დახმარების მანქანა, სპეციალური საინფორმაციო კარავი და ადამიანები, რომლებიც ტერიტორიაზე ივლიან სპეციალური ნიშნით "რეივერებზე ზრუნვა".

განცხადებაშია ნათქვამია:

• ფესტივალის ტერიტორიაზე იქნება სპეციალური კარავი, სადაც შეგეძლებათ მიიღოთ საინფორმაციო ბროშურები, კვალიფიციური ადამიანების რჩევები.
• ფესტივალის მიმდებარე ტერიტორიაზე იქნება სასწრაფო დახმარების რამდენიმე ეკიპაჟი. სხვა სასწრაფო დახმარების ბრიგადებთან ერთად მობილიზებული იქნება ევექსის სასწრაფო დახმარების, სრულად ეკიპირებული ეკიპაჟი.
• ფესტივალის ტერიტორიაზე მუდმივად ივლიან "რეივერებზე ზრუნვა" ნიშნიანი და პროექტ “მანდალას” ფარგლებში სპეციალურად დატრეინინგებული ახალგაზრდები, რათა საფრთხის შემთხვევაში დროულად მოვახდინოთ საჭირო რეაგირება.

აღნიშნული პროექტი ხორციელდებდა ორგანიზაცია ''მსოფლიო ექიმები - საფრანგეთის'' მხარდაჭერით.