თითქმის საუკუნის გასვლის შემდეგ, ნიუ-იორკის ცენტრალ-პარკი მალე ფეხით მოსიარულეებს, მორბენლებსა და ველოსიპედისტებს დაუბრუნდებათ. ქალაქის მერის, ბილ დე ბლასიოს გადაწყვეტილებით, ცენტრალ-პარკში ივნისიდან მანქანების მოძრაობა აიკრძალება. ცვლილება ავარიებისა და ჰაერის დაბინძურების თავიდან არიდებასაც ისახავს მიზნად.

გადაწყვეტილება ძალაში 27 ივნისიდან შევა - ამ დღეს, ქალაქში საჯარო სკოლები იხურება.

"ეს პარკი ავტომობილებისთვის არ მოწყობილა. ის მანამდე აშენდა, სანამ ავტომობილებს გამოიგონებდნენ. ცენტრალ-პარკი ხალხისთვის შეიქმნა. პარკში სიმშვიდისა და დაცულობის შეგრძნება გაიზრდება - ის რაც აქ აქამდე არ ყოფილა", - თქვა ბლასიომ განცხადებაში, რომელიც სწორედ ცენტრალ-პარკიდან გააკეთა.

მანჰეტენზე მდებარე პარკს, რომლის ფართობიც 3,41 კმ2-ია, ყოველწლიურად 42 მილიონზე მეტი ვიზიტორი ჰყავს. როგორც ურბანულ პარკს, ცენტრალ-პარკს ამერიკაში ყველაზე ხშირად სტუმრობენ. იქ არის ზოოპარკი, ტბები - სადაც ნავებით სეირნობენ, წყალსაცავი და ღონისძიების გასამართად განკუთვნილი ადგილები. პარკი 1857 წელს შეიქმნა.

კერძო ავტომობილებით გადაადგილება პარკში 2015 წელს აიკრძალა, ამჯერად კი ცვლილება საჯარო ტრანსპორტსა და ტაქსებს შეეხება.