რეგიონული განვითარებისა და ინფრასტრუქტურის ახალმა მინისტრმა მაია ცქიტიშვილმა საავტომობილო გზების დეპარტამენტის თავმჯდომარე გიორგი სეთურიძე თანამდებობიდან გაათავისუფლა. ამის შესახებ ინფორმაცია სამინისტროში On.ge-ს დაუდასტურეს.

გიორგი სეთურიძის ადგილს ირაკლი ქარსელაძე დაიკავებს. ის ბიძინა ივანიშვილთან დაახლოებული პირია. ირაკლი ქარსელაძე დრომდე თანაინვესტირების ფონდში სამეთვალყურეო საბჭოს თავმჯდომარე იყო. ის პანორამა თბილისის პროექტსაც ხელმძღვანელობდა.

საავტომობილო გზების დეპარტამენტის ყოფილი თავმჯდომარე პირველ არხთან საუბრისას ამბობს, რომ თანამდებობა თავისი სურვილით დატოვა.

„ახალი მინისტრის და ხელმძღვანელობის მოსვლის შემდეგ, ეს იყო ჩემი გადაწყვეტილება, რადგან ახალ გუნდს საშუალება მისცემოდა თავისი ხედვები უფრო თავისუფლად გაეტარებინა. შეთანხმება დღეს მოხდა. მე ამ თანამდებობას ვტოვებ“, – განაცხადა სეთურიძემ.

რამდენიმე დღის წინ, ევროპულმა საქართველომ საავტომობილო გზების დეპარტამენტი კორუფციულ გარიგებაში დაადანაშაულა. გიორგი სეთურიძემ პირველ არხს განუცხადა, რომ მისი თანამდებობიდან წასვლა ამ ბრალდებებს არ უკავშირდება.