კანონპროექტით, დამსაქმებელს აეკრძალება, კანდიდატისგან მოითხოვოს ისეთი სახის ინფორმაცია, რომელიც შეეხება მის რელიგიას ან რწმენას, შეზღუდულ შესაძლებლობებს, სექსუალურ ორიენტაციას, ეთნიკურ კუთვნილებას, ორსულობას. გამონაკლისი შესაძლოა იყოს სამუშაოს არსიდან, სპეციფიკიდან ან მისი შესრულების პირობებიდან გამომდინარე. შრომის კოდექსში შესატანი ცვლილებების პროექტი საქართველოს მთავრობის ინიციატივით პარლამენტშია დარეგისტრირებული.

კანონპროექტით, დამსაქმებელს, ეკრძალება კანდიდატისგან ისეთი ინფორმაციის მიღება, რომელიც დაკავშირებული არაა სამუშაოს შესრულებასთან და არაა საჭირო მისი შესაძლებლობების შესაფასებლად.

ასევე, ცვლილების თანახმად, ვაკანსიის გამოცხადებისას და შერჩევის ეტაპზე იკრძალება ნებისმიერი სახის დისკრიმინაცია:

  • რასის,
  • სექსუალური ორიენტაციის,
  • სქესის,
  • ასაკის,
  • შეზღუდული შესაძლებლობის,
  • კანის ფერის,
  • ენის,
  • ეთნიკური და სოციალური კუთვნილების,
  • ეროვნების,
  • წარმოშობის,
  • ქონებრივი და წოდებრივი მდგომარეობის,
  • საცხოვრებელი ადგილის,
  • რელიგიური კუთვნილების,
  • საზოგადოებრივი კუთვნილების,
  • პოლიტიკური კუთვნილების,
  • პროფესიული კავშირისადმი ან სხვა გაერთიანებისადმი კუთვნილების,
  • ოჯახური მდგომარეობის,
  • პოლიტიკური ან სხვა შეხედულების გამო.

„კანონპროექტის მომზადება განპირობებულია შრომით და წინასახელშეკრულებო ურთიერთობების ყველა ეტაპზე პირთა თანასწორუფლებიანობის დაცვისა და დისკრიმინაციის თავიდან აცილების მექანიზმების გაუმჯობესების აუცილებლობით“, - წერია პროექტის განმარტებით ბარათში.