EW-იმ ოსკარამდე რამდენიმე თვით ადრე გადაწყვიტა გამოევლინა საუკეთესო ფილმი.

ამისთვის კი გამოკითხვა ჩატარა, ერთმანეთს ის ფილმები ეჯიბრებოდნენ, რომლებმაც ოსკარი საუკეთესო კინოსურათის ნომინაციაში მიიღეს.

თითქმის ექვს თვიან გამოკითხვის ფინალში ერთმანეთს "შინდლერის სია" და "ქარწაღებულნი" შეერკინნენ.

საბოლოოდ გამოკითხვაში, რომელშიც მილიონზე მეტი ადამიანი მონაწილეობდა, გამარჯვებული მარგარეტ მიტჩელის წიგნის ეკრანიზაცი - "ქარწაღებულნი" გახდა.

აღსანიშნავია, რომ მიტჩელის ამ წიგნს დღემდე სწავლობენ ლიტერატურის მცოდნეები, როგორც ძალიან მსუყე წყაროს მაშინდელი ამერიკული სამხრეთის ღრმად გასაცნობად. ამერიკული სამხრეთი კი უმნიშვნელოვანესი რეგიონია - ესაა ადგილი, სადაც დაიწყო აფროამერიკელთა განმათავისუფლებელი მოძრაობა, სადაც ძალიან მწვავედ იდგა მონობის საკითხი და სადაც საბოლოოდ პროცესები დასრულდა მარტინ ლუთერ კინგის საეტაპო გამოსვლით - "I Have a Dream!"

რომანში, ისევე როგორც მის ეკრანიზაციაში მოვლენები მე-19 საუკუნეში, ამერიკაში, ჯორჯიის შტატში ვითარდება. სიუჟეტის ცენტრში ძირითადად იმდროინდელი მაღალი ფენის წარმომადგენლები არიან. კარგად არის ნაჩვენები მათი ყოველდღიური ცხოვრება, მასშტაბური წვეულებები, აზარტული თამაშები და უდარდელობა. უეცრად არისტოკრატებს საყრდენი ეცლებათ და ბედის ანაბარა რჩებიან. ცრუ წარმოდგენა, რომ მდიდრებისთვის ომი საშიში სულაც არაა, თვალის დახამხამებაში ინგრევა. ფილმის მთავარი პერსონაჟი სკარლეტ ო’ჰარა შესანიშნავი მაგალითია იმისა, თუ როგორ ცვლის გარემოებები ადამიანს და რისი გაკეთება შეუძლია ძლიერ ქალს, როცა ყველაფერი თავდაყირა დგება.

რამდენიმე თვის წინ, EW-იმ ასევე საუკეთესო მსახიობი ქალი გამოავლინა.

გამოკითხვაში, 64 ლეგენდარული მსახიობი მონაწილეობდა. ფინალში ერთმანეთს კი მერილ სტრიპი და ვივიენ ლი "შეერკინნენ".

გამოკითხვაში მონაწილეებს უნდა აერჩიათ, რომელი როლი და მსახიობი იყო ყველაზე ძლიერი.

ვივიენ ლის სკარლეტ ოჰარა "ქარწაღებულნიდან" თუ მერილ სტრიპის სოფი "სოფის არჩევანიდან".

საბოლოოდ გამოკითხვაში, რომელშიც მილიონზე მეტი ადამიანი მონაწილეობდა, გამარჯვებული ვივიენ ლი და მისი პერსონაჟი, სკარლეტ ოჰარა გახდა.

გამოკითხვის შედეგების მიხედვით მერილმა 45 პროცენტი მიიღო, ვივიენმა კი - 55.