რუსეთის ცენტრალურმა საარჩევნო კომისიამ ქსენია სობჩაკის დოკუმენტები განიხილა და საპრეზიდენტო არჩევნებში მონაწილეობის უფლება მისცა.

დოჟდის ცნობით, ახლა სობჩაკს, კანდიდატს "ყველას წინააღმდეგ" რეგისტრაციისთვის 100 ათასი ხელმოწერა სჭირდება. ამასთან, თითოეულ რეგიონში 2,5 ათასზე მეტი ხელმოწერის შეგროვება არ შეიძლება.

დოკუმენტები ცესკოში სობჩაკმა 25 დეკემბერს ჩააბარა. მანამდე კი საარჩევნო პროგრამა "123 რთული ნაბიჯი" წარადგინა, რომელიც შიდა პოლიტიკის, ეკონომიკის განვითარების, სოციალური პოლიტიკისა და საგარეო პოლიტიკის ბლოკებისგან შედგება.

სობჩაკისგან განსხვავებით, არჩევნებზე არ დაარეგისტრირეს პუტინის ყველაზე დიდი კრიტიკოსი და ოპოზიციონერი ლიდერი ალექსეი ნავალნი. რუსეთის ცესკო გადაწყვეტილებას იმით ხსნის, რომ ნავალნი ნასამართლევია სისხლის სამართლის საქმეზე, რაც არჩევნების შესახებ კანონს ეწინააღმდეგება. თავად ნავალნი კი კონსტიტუციაზე მიუთითებს, რომელშიც თავისუფლებაში მყოფი ადამიანის ნასამართლეობის გამო მისთვის უარის თქმაზე არაფერი წერია. ნავალნი რუსეთის ცესკოს გადაწყვეტილებას საკონსტიტუციო სასამართლოში გაასაჩივრებს. მანამდე კი არჩევნებს ბოიკოტი გამოუცხადა და მხარდამჭერებსაც იგივე მოუწოდა.