საერთაშორისო ოლიმპიური კომიტეტის აღმასკომის გადაწყვეტილებით, რუსეთის ნაკრებს 2018 წლის ზამთრის ოლიმპიურ თამაშებზე არ დაუშვებენ. აღნიშნული გადაწყვეტილების მიზეზად რუსი სპორტსმენების მიერ დოპინგის სისტემატური მოხმარება გახდა. გადაყვეტილების შესახებ ცნობილი ოლიმპიური კომიტეტის აღმასრულებელი კომიტეტის სხდომის პრეს-რელიზიდან გახდა ცნობილი.

რაც შეეხება იმ რუს სპორტსმენებს, რომლებიც არასდროს ყოფილან შემჩნეული დოპინგის მოხმარებაში, ისინი შეძლებენ ოლიმპიურ თამაშებზე ასპარეზობას, თუმცა ნეიტრალური დროშით და "ოლიმპიელი სპორტსმენის" ტიტულით. სუფთა დოპინგ ტესტის მქონე სპორტსმენები შეძლებენ მონაწილეობა მიიღონ როგორც ინდივიდუალურ, ასევე, გუნდურ შეჯიბრებებში და ამ მხრივ მათ არანაირი შეზღუდვა არ დაუწესდებათ.

2018 წლის ოლიმპიურ თამაშებზე არ იქნება წარმოდგენილი რუსეთის დროშა და არ გაიჟღერებს რუსეთის ჰიმნი.

თამაშებზე დასწრება აეკრძალათ ასევე იმ ექიმების, რომლის მეთვალყურეობის ქვეშ მყოფი სპორტსმენები შემჩნეული იყვნენ დოპინგის მოხმარებაში. თამაშებს გამოტოვებენ რუსეთის სპორტის სამინისტროს ის ჩინოვნიკები, რომლებიც ჩართული იყვნენ დოპინგ სკანდალში.

მსგავსი გადაწყვეტილება უპრეცენდენტო და პირველია საერთაშორისო ოლიმპიური კომიტეტის ისტორიაში. აქამდე შეზღუდვები მხოლოდ ცალკეულ სპორტსმენებს უწესდებოდათ. კომიტეტმა ყველა მომავალ ოლიმპიადაში ნებისმიერი სახით მონაწილეობა აუკრძალა რუსეთის სპორტის ყოფილ მინისტრ ვიტალი მუტკოს, რომელიც ამჟამად ვიცე-პრემიერის თანამდებობას იკავებს.

რუსეთს ასევე დაეკისრა ანტიდოპინგური გამოძიების ხარჯების სრული ანაზღაურება, რომელიც $15 მილიონ დოლარს აღემატება.

აღნიშნულ საკითხზე გამოძიებას საერთაშორისო ანტისადოპინგო კომიტეტი ორი წლის განმავლობაში ატარებდა. გამოძიების შედეგადად ათეულობით რუს სპორტსმენს სამუდამოდ აეკრძალა ოლიმპიურ თამაშებში მონაწილეობა. ასევე, დადგინდა დოპინგ ტესტების მასობრივი გაყალბების შემთხვევები 2014 წლის სოჭის ზამთრის ოლიმპიურ თამაშებზე. რიგ რუს სპორტსმენებს ჩამოერთვათ ოლიმპიური მედლები ხოლო, რუსეთის ნაკრებმა სოჭის ოლიმპიადის საერთო ჩათვლაში პირველი დაკარგა.

გამოძიების მთავარი მოწმე მოსკოვის ანტისადოპინგო ლაბორატორიის ყოფილი ხელმძღვანელი გრიგორი როდჩენკოვია. როდჩენკოვი 2016 წლის იანვარში აშშ-ში გადასახლდა. სწორედ მისი ჩვენებები იქცა გამოძიებისთვის მთავარ მტკიცებულებად.

რაც შეეხება მოსკოვის ოფიციალურ პოზიციას საკითხთან დაკავშირებით, ვლადიმერ პუტინის პრეს-მდივნის 4 დეკემბერს გაკათებული განცხადებით, ისინი არ განიხილავენ ოლიმპიური თამაშების ბოიკოტირების შესაძლებლობას. მას შემდეგ, რაც ცნობილი გახდა ოლიმპიური კომიტეტის გადაწყვეტილება, კრემლში საკითხის შესახებ განცხადება არ გაუვრცელებიათ.