"საქართველოს მოქალაქეთა ანტიანექსიური პლატფორმა" ახალ კვლევას აქვეყნებს, რომლის თანახმად, რუსეთის პოლიტიკა საქართველოს ოკუპირებულ ტერიტორიებზე — აფხაზეთსა და ცხინვალის რეგიონში — მხოლოდ სამხედრო ოკუპაციით არ შემოიფარგლება და რუსეთის პოლიტიკურ, სამართლებრივ, სამხედრო, ეკონომიკურ და სოციალურ სივრცეში მათი ეტაპობრივი და სისტემური ინტეგრაციით ხასიათდება.

ანგარიშის ავტორი პლატფორმის ერთ-ერთი დამფუძნებელი, სოციალურ მეცნიერებათა დოქტორი, საქართველოს ეროვნული უშიშროების საბჭოს მდივნის ყოფილი მოადგილე, თადარიგის პოლკოვნიკი ალექსი ბარბაქაძეა. "საქართველოს მოქალაქეთა ანტიანექსიური პლატფორმის" კვლევას IPN ავრცელებს.

ანგარიში 2008–2026 წლების დინამიკას ეყრდნობა და ოკუპირებულ რეგიონებში რუსეთის მიერ გამოყენებულ მექანიზმებს აანალიზებს. კვლევის დასკვნით, ცალკეული პროცესები ურთიერთდაკავშირებული ნაბიჯების სახით ქმნის დე ფაქტო ანექსიის მიმართულებით განვითარებადი ინტეგრაციის ნიშნებს.

კვლევის ძირითადი მიგნებები

"ოკუპაციიდან ფუნქციურ შთანთქმამდე

კვლევის მიხედვით, პროცესი შეიძლება აღიწეროს შემდეგი ჯაჭვით:

სამხედრო ოკუპაცია → ეფექტური კონტროლი → ინსტიტუციური დამოკიდებულება → სამართლებრივი ინტეგრაცია → დე ფაქტო ანექსიის ნიშნები.

ფორმალური სტატუსის შენარჩუნების მიუხედავად, ადგილობრივი ინსტიტუტების დამოუკიდებელი ფუნქციის სივრცე თანდათან მცირდება.

სამხედრო და უსაფრთხოების ინტეგრაცია

კვლევა განსაკუთრებულ ყურადღებას უთმობს რუსეთის სამხედრო ინფრასტრუქტურის გაძლიერებას, ადგილობრივი ძალოვანი სტრუქტურების რუსულ სისტემასთან დაახლოებას, ე.წ. საზღვრის კონტროლსა და ბორდერიზაციას, ასევე ადგილობრივი ფორმირებების რუსეთის სამხედრო ოპერაციებთან დაკავშირებას.

პოლიტიკური და საკადრო ინტეგრაცია

კვლევა აანალიზებს რუსეთის მოქალაქეებისა და რუსულ სახელმწიფო სტრუქტურებთან დაკავშირებული კადრების როლის ზრდას ადგილობრივ ადმინისტრაციულ სისტემებში. მაგალითად მოყვანილია ალან გაგლოევის 2026 წელს რუსეთის პრეზიდენტის მრჩევლის თანამდებობაზე გადასვლა.

ეკონომიკური, ქონებრივი და დემოგრაფიული ინტეგრაცია

კვლევა განიხილავს რუსეთის ფინანსურ და ეკონომიკურ სივრცეზე დამოკიდებულების ზრდას, საკუთრებისა და სტრატეგიული აქტივების საკითხებს, მათ შორის ბიჭვინთის სახელმწიფო აგარაკის გადაცემას, ასევე პასპორტიზაციასა და მოსახლეობის უფლებრივ მდგომარეობას.

კულტურული და კოგნიტური სივრცის ცვლილება

კვლევის ერთ-ერთ მიმართულებას წარმოადგენს განათლებისა და საინფორმაციო სივრცის რუსიფიკაცია, ქართული ენის პოზიციების შემცირება და კულტურული მემკვიდრეობის მიმართ არსებული პოლიტიკა. მაგალითად მოყვანილია ილორის წმინდა გიორგის ეკლესიაში განხორციელებული ცვლილებები, რასაც ავტორი ქართული კულტურული და არქიტექტურული იდენტობის კვალის შემცირების კონტექსტში განიხილავს.

დე ფაქტო ანექსიის ინტეგრირებული შეფასება კვლევაში გამოყენებული 5-ბალიანი შეფასების მიხედვით: აფხაზეთი — 4.1 / 5 ცხინვალის რეგიონი — 4.4 / 5", — აღნიშნულია კვლევაში.

ავტორის შეფასებით, ეს მაჩვენებლები არა ცალკეულ მოვლენებზე, არამედ სხვადასხვა სფეროში მიმდინარე პროცესების ურთიერთდაკავშირებულ დინამიკაზე მიუთითებს.

"ოკუპაცია იკავებს ტერიტორიას, ინტეგრაცია — ინსტიტუტებს, ხოლო საკადრო, ეკონომიკური და კულტურული წნეხი ცვლის სოციალურ ქსოვილს", — აცხადებს კვლევის ავტორი ალექსი ბარბაქაძე.

რაც შეეხება რეკომენდაციებს, ავტორები საქართველოს ხელისუფლებასა და საერთაშორისო პარტნიორებს კონკრეტულ ნაბიჯებს სთავაზობენ:

"შეიქმნას ოკუპირებულ ტერიტორიებზე რუსეთის ინტეგრაციისა და დე ფაქტო ანექსიის ნიშნების მუდმივი მონიტორინგის ეროვნული მექანიზმი და ორენოვანი მონაცემთა ბაზა; საერთაშორისო ანგარიშებში უფრო მკაფიოდ აისახოს რუსეთის მიერ ოკუპირებული ტერიტორიების პოლიტიკური, სამართლებრივი, სამხედრო და ეკონომიკური ინტეგრაციის პროცესი;

განიხილებოდეს მიზნობრივი საერთაშორისო ზომები იმ პირებისა და სტრუქტურების მიმართ, რომლებიც მონაწილეობენ უკანონო ქონებრივ, ადმინისტრაციულ და ინტეგრაციულ პროცესებში", — აღნიშნავენ ავტორები.

შეგახსენებთ, საქართველოს მოქალაქეების ანტიანექსიური პლატფორმა 27 აგვისტოს შეიქმნა. მისი მიზანი საქართველოს ტერიტორიული მთლიანობისა და სუვერენიტეტის მხარდაჭერაა.