მეტროსადგურ "ვარკეთილის" რეაბილიტაციის დასრულება კიდევ ერთხელ, ამჯერად 2026 წლის 30 დეკემბრამდე გადაიდო. ამის შესახებ bm.ge წერს.

გამოცემის ინფორმაციით, ახალი ვადა თბილისის სატრანსპორტო კომპანიასა და კონტრაქტორ კომპანია "ბადა ქონსთრაქშენსს" შორის გაფორმებული ხელშეკრულებით განისაზღვრა.

ხელშეკრულებაში ცვლილებები შევიდა თავად სარეაბილიტაციო სამუშაოების ტექნიკურ ნაწილშიც. კერძოდ, მგზავრთა მოსაცდელი დარბაზისა და დახრილი გვირაბის ჭერის მოსაპირკეთებლად თავდაპირველად გათვალისწინებული აკვაპანელის ნაცვლად ალუმინის ფირფიტების გამოყენება გადაწყდა.

ასევე შეიცვალა იატაკის მოპირკეთების მასალა — კერამოგრანიტის დაგების ნაცვლად არსებული ბუნებრივი გრანიტი შენარჩუნდება, რომელსაც მოხვეწენ და გააპრიალებენ. სარკინიგზო ბაქნის კედელზე კი კერამოგრანიტის ნაცვლად გრანიტის ფილები განთავსდება.

ცვლილებების შედეგად ხელშეკრულების ჯამური ღირებულება 13 240 611 ლარით განისაზღვრა, რაც წინა ღირებულებაზე 140 ათასი ლარით ნაკლებია. ამ ეტაპზე თბილისის სატრანსპორტო კომპანიას კონტრაქტორისთვის 9 380 792 ლარი აქვს გადახდილი, რაც ხელშეკრულების ღირებულების დაახლოებით 71%-ს შეადგენს.

მეტროსადგურ "ვარკეთილის" რეაბილიტაცია 2022 წლის 21 დეკემბერს დაიწყო. პროექტის თავდაპირველი ვადა 18 თვე იყო და სამუშაოები 2024 წლის 21 ივნისამდე უნდა დასრულებულიყო, თუმცა რეაბილიტაციის დასრულების ვადა არაერთხელ გადაიდო.