"მამუკა მდინარაძის წასვლა დანაკლისია. ამავდროულად, მას და მის გადაწყვეტილებას ვცემთ უდიდეს პატივს", — ამის შესახებ პარლამენტის იურიდიულ საკითხთა კომიტეტის თავმჯდომარემ, არჩილ გორდულაძემ ჟურნალისტებთან საუბრისას განაცხადა.

გორდულაძის განცხადებით, მამუკა მდინარაძის წვლილი გუნდის საქმიანობაში უდიდესია და მისი წასვლა სერიოზული დანაკლისია, თუმცა უმრავლესობა მის ნაბიჯს სრულ პატივისცემას უცხადებს. სადეპუტატო კორპუსის წარმომადგენლის თქმით, მდინარაძემ გადაწყვეტილება იმ გარემოებებიდან გამომდინარე მიიღო, რომლებიც თავადვე დეტალურად განმარტა.

"[მამუკა მდინარაძის] ღვაწლი არის უდიდესი ჩვენი გუნდისთვის. რა თქმა უნდა, მისი წასვლა დანაკლისია. ამავდროულად, მას და მის გადაწყვეტილებას ვცემთ უდიდეს პატივს. მან მიიღო ის გადაწყვეტილება, რომელიც ყველაზე მეტად [შესაბამისად] ჩათვალა სხვადასხვა პირობიდან გამომდინარე, რომელიც თავად ახსნა.

მან არაერთხელ ახსენა, რომ არაერთი სპეკულაცია და ჭორი მოჰყვება ამ ყველაფერსო [ირაკლი ღარიბაშვილის განცხადებები], მაგრამ ისაუბრა ძალიან გულწრფელად. ძალიან გულწრფელი იყო თავის საუბარში. ვინც კი ამ ადამიანს იცნობს, დარწმუნდებოდა მის გულწრფელობაში. თვითონ აქვს ნათქვამი, რომ არავისთვის არასდროს წერილი არ გაუგზავნია. დანარჩენი ყველაფერი არის აბსოლუტური სპეკულაცია," — განაცხადა გორდულაძემ (IPN).

ცნობისთვის, მამუკა მდინარაძემ პოლიტიკიდან წასვლის შესახებ განცხადება გუშინ მთავრობის ადმინისტრაციაში გამართულ ბრიფინგზე გააკეთა. მდინარაძემ პოლიტიკაში ყოფნის 10 წელი "შრომის, სამშობლოს ერთგულების და მეგობრებთან ერთად დიდი საქვეყნო საქმის კეთების პერიოდად შეაფასა".