საქართველოს ადვოკატთა ასოციაციის თავმჯდომარე ირაკლი ყანდაშვილი სოციალურ ქსელში განცხადებას აქვეყნებს და შსს-ს მოუწოდებს, რომ 12 წლის წინ დაკარგული გურამ დადიანიძის ოჯახის ადვოკატ ტარიელ კაკაბაძესთან დაკავშირებული საჯარო განცხადებები იყო ზედმიწევნით ზუსტი.

"დაუშვებელია ნებისმიერი ისეთი შეფასების თუ გარემოების გასაჯაროება, რაც შეიძლება არ ეფუძნებოდეს დადგენილ ფაქტს და მეორე მხრივ, გამოიწვევს დაუსაბუთებელ კითხვას წარმომადგენლის მიმართ.

საადვოკატო საქმიანობის განხორციელებისას ადვოკატის უფლებები სრულად უნდა იყოს დაცული.

დაზარალებულის ადვოკატი გამოძიების მწარმოებელი ორგანოსთვის არის დამატებითი მხარდაჭერა საქმეზე ერთობლივი ძალისხმევით დადგინდეს სიმართლე", — წერს ირაკლი ყანდაშვილი.

შეგახსენებთ, 18 აგვისტოს, 2014 წლის ლომისობას დაკარგული 17 წლის გურამ დადიანიძის სოციალურ ქსელში ოსურ დიალექტზე დაწერილი სტატუსი გამოჩნდა: Арцыд растаг, რაც თარგმანში ნიშნავს "მოვიდა დრო".

20 აგვისტოს შსს-მ განცხადება გაავრცელა, სადაც ნათქვამია, რომ 18 აგვისტოს გავრცელებული სტატუსის შესახებ წინასწარ იცოდნენ დაკარგული ბიჭის დედამ, სოფო ბიბილაშვილმა და ადვოკატმა ტარიელ კაკაბაძემ. შსს-ს განცხადებას ტარიელ კაკაბაძე გამოეხმაურა და შსს სიცრუის გავრცელებასა და მისი დისკრედიტაციის მცდელობაში დაადანაშაულა.