ცენტრალური აფრიკის რესპუბლიკაში, 18 აგვისტოს, არალეგალური წესით მომუშავე ოქროს მაღაროს ჩამონგრევას 100-ზე მეტი ადამიანი ემსხვერპლა. ამის შესახებ ადგილობრივი სამთო-მოპოვებითი ასოციაციის მაღალჩინოსანმა განაცხადა. ინფორმაციას France24 ავრცელებს

პროკურორმა დაადასტურა, რომ კამერუნის საზღვართან, სოფელ ზამბოიეს მახლობლად, მაღარო ჩამოინგრა. მისი თქმით, დაღუპულთა ზუსტი რაოდენობა და შემთხვევის სხვა დეტალები ამ დროისთვის დგინდება.

გავრცელებულ კადრებში ჩანს ტალახით დაფარული მაღაროელები — ძირითადად ახალგაზრდა ქალები და კაცები — რომლებიც ორმოდან ერთ-ერთი დაღუპულის ცხედრის ამოყვანას ცდილობენ. ტერიტორიაზე ათობით სხვა მაღაროელი და მუშაც იმყოფება, ზოგი მათგანი კი დახმარებას ითხოვს.

პროკურორის განცხადებით, სამძებრო-სამაშველო სამუშაოები გრძელდება. ასევე დაიწყება გამოძიება, რომელმაც მაღაროს ჩამონგრევის მიზეზები უნდა დაადგინოს და გამოარკვიოს, ვინ ხელმძღვანელობდა სამუშაოებს.

დაღუპულთა რიცხვი, სავარაუდოდ, კიდევ გაიზრდება, რადგან რამდენიმე ადამიანი კვლავ დაკარგულად ითვლება, ნაწილი კი ნანგრევების ქვეშაა მოყოლილი. ამის შესახებ ზამბოიეს ახალგაზრდული საბჭოს წევრმა ბერტრან ბე იანგემ განაცხადა.

კამერუნის ხელისუფლებამ განაცხადა, რომ მზად არის, საზღვრის გადმოკვეთის შემთხვევაში დაშავებულები მიიღოს და მათ სამედიცინო დახმარება აღმოუჩინოს.

მცირე მასშტაბის სამთო მოპოვება აფრიკაში მილიონობით ადამიანის საარსებო წყაროა, თუმცა სუსტი რეგულაციები და უსაფრთხოების დაბალი სტანდარტები ხშირად მძიმე და ფატალურ შემთხვევებს იწვევს.