სომხეთის პრემიერმინისტრის, ნიკოლ ფაშინიანის განცხადებით, ქვეყნის საგარეო პოლიტიკის მთავარი პრინციპი სხვადასხვა მიმართულებით ურთიერთობების გაფართოება და პარტნიორული კავშირების დივერსიფიკაციაა, ხოლო უცხოელი პარტნიორების განცხადებები საერთაშორისო დიალოგის ბუნებრივი ნაწილია. ამის შესახებ მან 20 აგვისტოს გამართულ ბრიფინგზე განაცხადა.

ევრაზიის ეკონომიკურ კავშირში (ЕАЭС) მიმდინარე ინტეგრაციულ პროცესებსა და სომხეთის ევროპული ინტეგრაციის მიმართ ორგანიზაციის წევრი ქვეყნების პოზიციაზე დასმული კითხვის პასუხად ფაშინიანმა აღნიშნა, რომ პარტნიორების განცხადებები ულტიმატუმებად არ უნდა აღიქმებოდეს.

"ЕАЭС-ის ქვეყნების ლიდერების განცხადება, რომ ისინი რეფერენდუმის ჩატარების იდეას მხარს უჭერენ, მოთხოვნა კი არა, მეგობრული ჟესტია. ისიც ჩვენი ინიციატივაა, რომ გარკვეულ ეტაპზე რეფერენდუმი აუცილებელი იქნება. ჩვენთვის სასიამოვნოა, რომ პარტნიორები ამ პოზიციას იზიარებენ და სომხეთის ევროპული დღის წესრიგის წინააღმდეგ არ გამოდიან. საერთაშორისო ურთიერთობებში სახელმწიფოები მუდმივად გამოხატავენ საკუთარ ინტერესებს — ეს სრულიად ნორმალური პროცესია“, — განაცხადა პრემიერმინისტრმა.

ფაშინიანის თქმით, სომხეთის ამჟამინდელი კურსის მთავარი განსხვავება წინა პოლიტიკასთან ის არის, რომ ერთ მიმართულებაზე დამოკიდებულება მრავალვექტორული თანამშრომლობით შეიცვალა.

"ადრე სტრატეგიული თანამშრომლობა მხოლოდ ერთი მიმართულებით გვქონდა. დღეს ურთიერთობებს ვავითარებთ საქართველოსთან, ჩინეთთან, საფრანგეთთან, ნიდერლანდებთან, ყაზახეთთან და სხვა ქვეყნებთან. ეს ბალანსირებული მიდგომა სამხედრო-ტექნიკურ სფეროშიც აისახება: თუ ადრე თანამშრომლობის 85–90% ერთ ქვეყანაზე მოდიოდა, ახლა უკვე ათეულობით პარტნიორთან ვმუშაობთ. მაისის სამხედრო აღლუმზე წარმოდგენილი იყო შვიდი სხვადასხვა ქვეყნის სამხედრო ტექნიკა და შეიარაღება, რაც ამ დივერსიფიკაციის ნათელი მაგალითია", — აღნიშნა ფაშინიანმა.

მისი თქმით, იგივე დივერსიფიკაციის პრინციპები ეკონომიკაშიც მოქმედებს და ამ სფეროში დაბალანსებულმა მიდგომამ უკვე ხელშესახები შედეგებიც გამოიღო.