ბიზნესმენ ირაკლი რუხაძის "ჰანიველ პარტნერსის" საკუთრებაში არსებულმა რუსთავის მეტალურგიულმა ქარხანამ ("რუსთავის ფოლადმა") არმატურის საწარმოო ხაზი მეტალურგიულ კომპანია "პიემ მეტალზე" გაასხვისა. ამის შესახებ კომპანიის ამონაწერიდან და საქართველოს კონკურენციისა და მომხმარებლის დაცვის სააგენტოს ვებგვერდებზე გამოქვეყნებული ინფორმაციიდან ირკვევა. ინფორმაციას Bm.ge ავრცელებს.

რეესტრის თანახმად, "რუსთავის ფოლადმა" 2025 წლის დეკემბერში დააფუძნა კომპანია "იბერია რიბარი", რომელსაც გადასცა კომპანიის საკუთრებაში არსებული არმატურის საწარმოო ხაზი, ხოლო 2026 წლის 30 ივლისს "იბერია რიბარის" მფლობელი გახდა ბიზნესმენ გიორგი მირიანიშვილის საკუთრებაში მყოფი "პიემ მეტალი".

ნასყიდობის ხელშეკრულებას თან ერთვის "რუსთავის ფოლადის" კრედიტორი ბანკების თანხმობა ამ ტრანზაქციის შესახებ.

იმის შესახებ, რომ კომპანია "რუსთავის ფოლადი" არმატურის სეგმენტის გაყიდვას გეგმავდა, კომპანიის უკვე ყოფილმა, გენერალურმა დირექტორმა იგორ კორიტკომ 2026 წლის იანვარში BMG-სთან ინტერვიუში განაცხადა. მისი თქმით, არმატურის სეგმენტში საქართველოს ბაზარზე კონკურენცია საკმაოდ რთული იყო, რასაც იმპორტის მნიშვნელოვანი მოცულობაც ერთოდა, სწორედ ამიტომ კომპანიამ უნაკერო მილების გაყიდვაზე აიღო ძირითადი აქცენტი. ამასთან, მიმდინარე წლის აპრილში ბიზნესმენმა ირაკლი რუხაძემ "რუსთავის ფოლადის" და "ქართული ცემენტის" შესაძლო გაყიდვაზე BMG-ის კითხვას უპასუხა.

ირაკლი რუხაძემ "ლიბერთი ბანკი" "ბაზისბანკს" მიჰყიდა

შეგახსენებთ, რომ მიმდინარე წლის აპრილში ირაკლი რუხაძემ "ლიბერთი ბანკიც" "ბაზისბანკს" მიჰყიდა". მანამდე, თებერვალში რუხაძემ და მისმა პარტნიორებმა სამთავრობო "ტელე-იმედი" გაყიდეს.

ირაკლი რუხაძემ ტელეკომპანია "იმედი" გაყიდა — ვინაა მყიდველი?